Pagsubli sa suholan
Nahawan nang agianan sa bag-ong uminto sa suholan sa Sugbo, Bohol, Negros Oriental ug Siquijor karong tuiga. Kini human niangkon ang kadagkoan sa Regional Tripartite Wages and Productivity Board (RTWPB) sa Central Visayas nga lapas nang usa ka tuig human sa kataposang uminto niadtong Marso 10, 2017.
Di nang kadangop ang mga negosyante sa technicality sa pagpangita og supervening condition ug makahimo nang RTWPB pagsugod sa konsultasyon sa nagkalainlaing sektor dinhi sa rehiyon pila ang labing tukma nga uminto sa minimum nga suholan nga P308 hangtod sa P366 matag adlaw.
* * *
Sa di pa mosumbalik ang mga negosyante nga itlog ray ikahatag nga uminto sa suholan kay sama sa mga anak sa singot naigo sab sila Tax Reform for Acceleration and Inclusion (TRAIN) Law ni Presidente Rodrigo Duterte ug kay Semana Santa na man sunod semana, angay nila ning pamalandongan:
P146 ngadto sa P167 matag adlaw na ang labaw sa minimum nga suholan sa Metro Manila (P475 ngadto sa P512) kon itandi sa Central Visayas; ug P247 matag adlaw kon itandi sa Autonomous Region in Muslim Mindanao (P265), ang labing kabos nga rehiyon.
* * *
Mao nga samtang pulos may sukaranan ang mga petisyon sa nagkalainlaing unyon, mas makiangayon nga palambuon ang gilusad nga kampanya pag-awhag sa Kongreso, nga maoy tinubdan sa gahom sa wage boards, pagtakda og uniporme nga minimum nga suholan sa tibuok nasud.
Mas dako ang kahigayonan nga maminaw ang mga senador ug mga kongresista, labi na kay eleksiyon na sunod tuig, kay sa mayoriya sa mga sakop sa wage boards nga tua kapusta sa mga negosyante.
* * *
Kon makumbinser ang Senado ug ang House of Representatives sa pagsubli sa suholan, nga ila gyod untang trabaho apan gitahan ngadto sa wage boards sa niaging 29 na ka tuig, angay sab nga tul-iron ang usa sa labing dakong inhustisya sa atong panahon.
Angay nga tangtangan sa ilang gahom sa pagbotar atol sa deliberasyon sa wage boards ang mga representante sa National Economic and Development Authority (NEDA) ug Department of Trade and Industry (DTI) kay kasagaran adto modapig ang duha ka representante sa management ug busa kanunay gyong mapilde ang duha ka representante sa labor.
- Latest
