Buslot ug latigo
Nakabantay ko og mga buslot sa binayloay nilang Comelec Chairman Andres Bautista ug sa iyang asawang si Patricia nga makapaturok sa mga pagduda sa ilang kaligdong:
• Si Patricia niinsistir nga P260 milyones ra ang iyang gipangayo o katunga sa unsay limpiyo nga katigayonan sa iyang bana apan ang una niyang abogada nga si Lorna Kapunan niinsistir nga P620 milyones ang ilang gidemanda; samtang
• Si Andres nipasalig nga iyang mapasabot ang tanang kuwarta ug dokumento apan dihang gisukna sa mga dokumento nga di niya mapatin-aw nidayon og pasangil nga mahimong gimaniobra sila.
* * *
Gipangutana sa Arangkada sa dyAB Abante Pa, Bisaya! si Atty. Kapunan unsay sukaranan sa P620 milyones sa demand letter nga iyang gipada ni Andres niadtong Pebrero ning tuiga. Nitubag siya nga gikuwenta lang nila ang katunga sa kapin sa P1.2 bilyones nga ilang nasubay nga kinatibuk-ang katigayonan ni Andres.
Dihang among gipangutana nganong nangayo sila og katunga sa katigayonan nga ilang gidudahan nga kinawat, niingon si Kapunan nga mao lang toy ilang bargaining position aron mahimong sukaranan sa sabutsabot sa labing makiangayon nga bahinay sa kabtangan sa magtiayon.
* * *
Sa wa pa moatubang ni Presidente Rodrigo Duterte ang magtiayong Bautista niadtong Agosto 1, nagkasabot na sila og kantidad: P150 milyones. Niuyon na si Patricia nga P90 milyones ang iyang bahin ug P60 milyones ang trust fund alang sa upat nila ka anak.
Apan nagdumili pagpirma si Patricia sa kauyonan tungod sa duha ka kundisyon nga gipahamtang ni Andres: Pagmatuod ni Patricia nga di kinawat ang katigayonan ni Andres; ug pagtumbok nga si Kapunan ang nisugo niya pagkawat sa bank books ug ubang dokumento.
* * *
Nikisikisi si Kapunan sa kundisyon ni Andres. Matod niya nga nakuha nang Patricia ang nagbuntaog nga mga dokumento dihang nidangop sa iyang law office niadtong Nobyembre sa niaging tuig ug nga wa kinahanglanang manlungkab si Patricia kay gibilin ni Andres ang mga yawe.
Sayop sang pagtuo ni Andres nga gitaktak nang Patricia si Kapunan. Kinsa nipahibawo nga siya nay tigpamaba ni Patricia. Ug makapakugang ang una niyang mga pahibawo isip tigpamaba: May duha ka kabtangan si Andres nga gihimong sex den ug nakuhaan nila og latigo ug condoms.
- Latest
