_freeman
^

Ganti sa kaligdong

ARANGKADA - Leo Lastimosa (The Freeman) - May 7, 2017 - 12:00am

May inilang abogado kansang lapad nga kinaadman ug talagsaong katakos sa balaod gitugbangan sa dako uyamot nga buslot: Di siya mangahas pagpanalipod sa iyang mga kliyente nga sa iyang tan-aw sad-an. Gibuyag ug gibugal-bugalan sa iyang kaubanang mga abogado ug mga huwes. Apan lig-on ang iyang baruganan.

Iyang mga kliyente nahibawo nga kon pabor nilang balaod, bisan unsa pa kadako ug kagamhanan ang ilang kaatbang, seguro sila'ng modaog; apan kon sila'y sayop di na sila angayng mag-usik sa panahon sa pagdangop ug pagpalaban niya.

***

Sa usa niya ka kaso, gipasanginlan ang iyang kliyente nga nangawat. Niduol siya sa huwes nga iyang giingnan: "Kon may maayo kang masulti mahitungod sa akong kliyente, himoa na. Di ko. Kon mosuway ko pagpanalipod niya, mabantang nga siya sad-an, ug makonbikto siya."

Mahimong pugson sa mga huwes ang mga abogado sa pagdawat sa mga kaso, labi na kon wa'y laing makarepresentar sa kabos nga mga kliyente ug nga mosangpot sa kalangay sa mga husay. Apan di sila mapugos pagpamakak alang sa ilang mga kliyente.

***

Sa husay sa lain niyang kasong kriminal, ang abogado nihunghong sa iyang kaubang abogado: "Sad-an 'ning akong kliyente, palihug panalipdi siya. Di ko." Gihangop sa iyang kauban ang kaso tungod sa kadako sa bayad.

Nakaangkon og daghang pagdayeg ang abogado. Apan ang pagdumili pagdawat sa pipila ka kaso gisakyan sa iyang mga kaatbang dihang nisud siya sa politika nga mga ebidensiya sa iyang kahuyang paghimo og lisod nga politikanhong mga desisyon.

***

Tuod man, napilde siya sa unang mga pagsuway pagdagan sa lokal ug nasudnong mga katungdanan kay nagdumili sa pagpamakak sa iyang kampanya sa lokal nga piniliay ug nisuporta sa iyang kaatbang nga sama niya og baruganan apan gituohang mas dako og kahigayonan nga modaog sa nasudnong piniliay. Nabangkarota pa g'yud ang iyang negosyo ug nakasunod og dakong utang tungod sa pag-insistir pagtuman sa mga lagda.

Ang tarung nga abogado, pilderong politiko ug nabangkarotang negosyante, nga naapil sa libro nga "Give and Take" ni Adam Grant, nga nimatuod nga ang kaligdong ug kamanggihatagon mao'y labing maayong mga puhonan sa kalamposan, mao si Abraham Lincoln (1809-1865), ang ika-16 nga presidente sa Estados Unidos.

leo_lastimosa@abs-cbn.com

ABOGADO
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with