Poe, Chiz ug Imelda
Kun si Senador Chiz Escudero ang paminawon, way problema si Senador Grace Poe sa disqualification cases nga iyang giatubang sa Senate Electoral Tribunal, Commission on Elections ug Korte Suprema. Kini bisan gikanselar na sa duha ka divisions sa COMELEC ang certificate of candidacy ni Poe.
Gipaabot nga mosangko sa labaw’ng hukmanan ang tanang kaso. Giapelar nang Rizalito David sa Korte Suprema ang pagbasura sa SET sa iyang petisyon batok ni Poe. Samtang moapelar sab si Poe sa Korte Suprema sa pagkakanselar sa iyang COC sa first ug second divisions. Masaligon si Escudero nga sama sa mga kaso ni Fernando Poe Jr. sa 2004 mahukman sa Korte Suprema ang mga kaso sa anak sa di pa’ng piniliay sunod tuig.
***
Bisan nawad-an na og paglaom si Poe nga dapigan siya sa COMELEC en banc, nga maoy mosubli sa mga hukom sa duha ka divisions, mas dako ang pagsalig ni Escudero sa mga mahistrado sa Korte Suprema nga maoy makahimo sa mas makiangayon nga paghubad sa mga balaud.
Sa iyang pagduaw sa Arangkada sa dyAB Abante Pa, Bisaya!, gitumbok ni Escudero ang disqualification case batok ni kanhi unang ginang Imelda Romualdez-Marcos dihang nidagan pagka kongresista sa Leyte niadtong 1995. Managsama silang Imelda ug Poe nga nasayop sa gitas-on sa residence nga ilang gisuwat sa COC.
***
Nisuwat si Imelda sa iyang COC nga nakapuyo siya sa distrito sa Leyte nga iyang gidaganan sud sa pito ka buwan. Nga mas mubo kay sa gikinahanglan sa balaud nga usa ka tuig. Mao sab si Poe. Nisuwat sa iyang COC pagka senador niadtong 2013 nga unom ka tuig ug unom ka buwan ang iyang residence sa Pilipinas. Sa ato pa, kon basehan ang COC, siyam ka tuig ug unom ka buwan pang iyang residence, kuwang sa gitakda sa balaod nga napu ka tuig.
Matod ni Escudero gitugotan sa Korte Suprema ang kandidatura ni Imelda 20 ka tuig nang nilabay. Pinasikad sa samang mga balaud, naneguro siyang tugotan sa’ng kandidatura ni Poe karon.
***
Sa kaso ni Imelda, gitumbok sa labaw’ng hukmanan nga ang gitas-on sa residence ni Imelda angayng kuwentahon pinasikad sa iyang tinguha pagbalik sa Leyte bisan kon sa Metro Manila siya aktuwal nga nagpuyo.
Nipasabot si Escudero nga kapamatud-an nila nga ang tinguha ni Poe pagbalik sa Pilipinas mas taas pa kay sa napu ka tuig nga residency requirement sa katungdanan pagka presidente. Matod ni Escudero gibaligya ni Poe ang iyang bay sa Estados Unidos ug nipalit og luna ug nagpatukod og bay sa Pilipinas ug gibalhin sa pagpaeskuyla ang iyang tulo ka anak sa elementarya, high school ug kolehiyo gikan sa Estados Unidos nganhi sa Pilipinas.
- Latest
