Nangigi ang anak
Dear Tito Miguel,
Maayong hapon Tito. Usa ako sa magbasahan sa newspaper. Ako diay si Arlin, single mom ug aduna akoy duha ka mga anak. Ang anak nako nga lalaki tua sa Liloan, ang babaye kuyog nako. Ug mao nay akong problema kay masuko man siya nako nga naa koy uyab nga maghatagan nako'g kwarta. Masuko siya nako, pero kun naa na gani koy kwarta kusog kaayo mangayo sa ako. Unsaon man nako ni siya aron dili masuko, Tito Miguel? — Arlin
Arlin,
Wa ka maghisgot pilay edad sa imong anak nga babaye. Kay kun bata pa kaayo lisod gyud na pasabton ngano sa imong kinabuhi naay laing tawo. Lagmit nagselos kay iyang nakita duna na siya’y kapikas sa imong panahon ug pagmahal.
Apan maski unsang edara, kinahanglan siya hinay-hinay makaamgo nga lisod kun ikaw magpabilin mag-inusara. Istoryaha siya kausa, pasabta nga ikaw malipayon kuyog sa imong uyab, apan dili pasabot magul-anon kuyog sa imong anak. Ingna nga ang tawo dunay nagkalain-lain nga gihigugma, ginikanan, igsuon, bana, asawa, uyab o higala. Busa dili angay ikumpara, kay natural lamang nga ang tawo mangita’g kuyog sa kinabuhi, sama niya inig abot sa panahon. Ipasalig nga dili maibanan imong pagpangga niya. Gani kini mapun-an pa sa imong uyab. Apan lagmit di gihapon makumbinsi ug magpadayog kisi-kisi. Ayaw pugsa. Inay nga imong sugaton iyang pagbalibad, ipakita kaniya nga imong pag-atiman ug pag-amuma way paglubad kuyog sa imong uyab. Ayaw na ipamulong nga imong uyab angay niya dawaton. Ipaagi ninyong duha sa buhat, hinay-hinay apan kanunay hangtod nga siya mismo makaamgo nga wala man diay dautan kun iyang inahan sa gubat sa kinabuhi dunay katimbang. —Tito Miguel
Magpatambag ka? I-text sa 0998-581-5856
- Latest