Maayong mga timaan sa Sugbo
Gawas nga di na mabugalbugalan ang Sugbo nga epicenter sa COVID-19 sa Pilipinas, niay duha ka maayong kalamboan sa kampanya pagbadlong sa lapad ug paspas nga tinakdanay dinhi sa ato:
- Niabot na og walo ang accredited nga molecular laboratories (takos pag-ila sa SARS-COV-2, ang kagaw nga mosangpot sa COVID-19) sa Sugbo ug Central Visayas; ug
- Ni-us-os nang positivity rate (gidaghanon sa nag-positibo kon itandi sa gidaghanon sa tanang swab samples nga gisumiter sa mga laboratoryo), sa ato pa, nadugangan nang gidaghanon sa swab testing ug nihinay nang pagkatap sa kagaw.
***
Gipahibawo sa Department of Health sa Central Visayas (DOH-7) sa ilang opisyal nga Facebook page nga nisaka ngadto sa 1,621 ang swab tests nga nahimo sa duha ka laboratoryo sa gobyerno ug unom ka pribadong laboratoryo niadtong Miyerkules, Agosto 5.
Nga mas daghan kay sa 1,179 ka tests niadtong Martes, Agosto 4; sa 838 ka tests niadtong Lunes, Agosto 3; ug sa 1,109 ka tests niadtong Dominggo, Agosto 2; apan nalabwan sa 2,142 ka tests niadtong Sabado, Agosto 1.
***
Sa walo ka laboratoryo, unom ray nakataho sa DOH-7: Cebu TB Reference Laboratory (CTRL) may 818 ka tests, Subnational Laboratory (SNL) sa Vicente Sotto Memorial Medical Center (VSMMC) may 621, University of Cebu Medical Center (UCMed) may 67, Prime Care Alpha Laboratory (PCA) sa Mactan Cebu International Airport (47), ARC Hospitals sa Agus, Lapu-Lapu City (40), ug Gov. Celestino Gallares Memorial Hospital (GCGMH) sa Tagbilaran City (28).
Way taho gikan sa mga laboratoryo sa Philippine Red Cross (PRC) ug sa Cebu Doctors University Hospital (CDUH).
***
Makadasig sang pag-us-os sa positivity rate niadtong Miyerkules, Agosto 5, ngadto sa 5.7% (93 ang positibo sa 1,621 ka samples), nga gamay na lang og labaw sa gitakda sa World Health Organization (WHO) nga 5% o mas ubos pa pagtimaan nga naapil sa swab testing ang igong gidaghanon sa populasyon ug nakontrolar nang tinakdanay.
Kinatas-ang positivity rate karong buwana niabot og 10.8% (128 ang positibo sa 1,179 ka samples) niadtong Martes, Agosto 4. Ubos na hinuon kaayo kon itandi sa 32.8% nga positivity rate sa Dakbayan sa Sugbo niadtong Hunyo.
- Latest
