Taliwala sa COVID-19 pandemic padayon gihapon ang training sa Big Yellow
CEBU, Philippines — Masaligon kaayo si Big Yellow Boxing Gym trainer Christopher 'Pingping' Tepora nga mabalik ra sa normal ang boksing sa umaabot mao nang wa'y hunong ang iyang training ug pagpakondisyon sa iyang mga boksidor.
Samtang nagpuyo sa ilang balay didto sa Barangay Sabang, Danao City, si Tepora kanunay mikontak sa iyang mga batos diin iya kining gihatagan og mga workout pinaagi sa Facebook chat ug videocalls aron tabangan sila nga magpabiling aktibo ug anaa sa maayong porma taliwala ning kwarantin.
"Naa rako karon dire sa balay para makalikay sa Covid," matud pa sa 36-anyos nga si Tepora. "Pero nagpadayon gihapon mi sa training sa among mga boxers sa Big Yellow para ready na daan kung mabalik na sa normal ang tanan."
Isip beteranong trainer, gikonsiderar ni Tepora ang paghulma nilang John Riel 'Cuadro Alas' Casimero ug sa iyang manghod nga si Jhack 'El Capitan' Tepora nga mamahimong world champions nga maoy labing dako niyang dungog ug nakab-ot.
Sa pagka karon, si Tepora dunay gihashas nga pito ka mga boksidor sa sa Big Yellow Gym nga gipanag-iya ug giduma sa magtiayong Seth ug May Tio.
Apil na niini sila si World Boxing Foundation (WBF) Intercontinental minimumweight champion Clyde Azarcon (17-3-1, 6KOs) ug World Boxing Organization (WBO) Asia Pacific Youth bantamweight champion Carlo Demecillo (15-5-1, 8KOs). Si Tepora nagkanayon nga mapasalamaton kaayo sila sa mga Tio gumikan sa suporta ngadto kanila ning panahon sa krisis.
"Dako kaayo among pasalamat sa among manager na magtiayon, si sir Seth ug mam May Tio kay wala gyud mi nila biyai taliwala niining krisis karon ug nagpadayon gihapon sila sa ilang suporta," matud pa ni Tepora. Bisan pa man og wala pa'y klaro ang ugma taliwala nilang pandemya, si Tepora malaumon nga mabalik ra sa normal nga sitwasyon ang tanan.
"Sa mga boxers, ayaw lang mo kawala og paglaum. Mabalik rani sa normal ang tanan ilabi na ang boxing. Ampo ug salig lang ta sa Ginoo kanunay," sumala pa ni Tepora.
- Latest