Maynila: Kaso ng dengue at leptospirosis, patuloy ang paglobo
MANILA, Philippines — Patuloy umano ang paglobo ng naitatalang kaso ng dengue at leptospirosis sa lungsod ng Maynila.
Batay sa Daily W.I.L.D. Disease Update na inilabas ni Manila Mayor Isko Moreno Domagoso, nabatid na nitong Biyernes lamang, Setyembre 11, ay nakapagtala pa ang Manila Health Department (MHD) ng 53 bagong kaso ng dengue at 46 bagong kaso ng leptospirosis.
Kaya ang total dengue cases sa lungsod ngayong taon, o mula Enero 1 hanggang Setyembre 11, 2026, ay pumalo na sa 2,862 habang ang total leptospirosis cases naman ay umakyat na sa 1,224.
Nasa 48 naman ang bagong kaso ng influenza-like illness (ILI) na naitala ng MHD nitong Biyernes, sanhi upang umabot na sa 1,499 ang total cases nito ngayong taon.
Tig-isang kaso naman ang nadagdag sa datos ng severe acute respiratory infection (SARI) na may 353 total cases na ngayon taon, at sa COVID-19 na may 92 confirmed cases na.
- Latest
