Celtics nakabawos

CEBU, Philippines — Nagmangtas ang Boston Celtics hinungdan nga gibaslan niini ang Miami Heat, 117-106 sa Game-3 sa "ilang best-of-seven" NBA Eastern Conference Finals kagahapon didto sa Orlando, Florida.

Si Jaylen Brown miiskor og 26 puntos, samtang si Jayson Tatum miamot og 25 puntos ug 14 ka rebounds alang sa Celtics nga nakalihay nga malubong sa 0-3 sa serye diin wala pa'y team nga nakabangon sa NBA.

Sukwahi sa miagi nilang duha ka kapildihan, ang Celtics wala na molingi pa sukad nakalabaw og 20 puntos sa katapusang kuwarter.

Labaw ang Celtics, 31-22 human sa first period ug miburot pa kini ngadto sa 12 sa sayong bahin sa second quarter sa wala pa moaksiyon og sikit ang Heat.

Igo lamang nakasikit ang Heat ngadto sa singko puntos sa himalatyong segundos sa duwa gumikan kay miratsada sab dayon ang Celtics aron pagseguro sa ilang 11 puntos nga daog.

"Down 0-2 in the series, we played some games we thought we should have played better," matud pa ni Brown. "We wanted to make it an emphasis to come out tonight and play 48 minutes, and we did."

Si Bam Adebayo maoy nangu sa nabugnaw nga Heat uban ang 27 puntos, 16 ka rebounds ug tulo ka steals, samtang si Tyler Herro midugang og 22 puntos ug si Jimmy Butler dunay 17 puntos alang sa pilderong koponan.