Mabungahong Bag-ong Tuig

Unang adlaw karon sa Bag-ong Tuig. Ug tugoti akong mo-greet kaninyo og usa ka mabungahon ug malinawon nga 2017 kanatong tanan. Hinaut nga molampos kita sa unsa man natong mga paningkamot niining lain nga tuig nga atong sagubangon.

Maka-expect kita og mga dagkong challenges karong 2017. Sama sa nakalabay nga tuig, dagko  na usab nga pagsulay ang atong sagubangon, personal man kini o kabahin sa kalihokan sa komunidad o sa natad sa pulitika.

Dili gayud ikalimod nga makasaysayanon ang nakalabay nga tuig. Tungod kay tuig kadto sa eleksiyon, grabe ang hugyaw sa pulitika ang atong nasinati. Wala kita magdahom nga moarangkada ang kandidatura ni Rodrigo Duterte ug midaug gayud sa presidential elections. Siya ang unang presidente nga gikan sa Mindanao.

Sa tuig 2016 atong nakita usab  ang gihingusgang kampanya batok sa druga. Kini isip pagtuman sa saad ni Duterte atol sa iyang  kampanya panahon sa piniliay nga iyang himuon nga prayoridad ang pagsumpo sa negosyo sa ginadiling druga.

Tuod man, liboan kinsa giingong mga nalambigit sa druga ang nahagba. Apan nasagolan og dakong kontrobersiya ang maong kampanya tungod sa mga alegasyon nga liboan niadtong mga napatay mga biktima sa extrajudicial killing nga gipaluyohan sa kapolisan.

Ug makapaabot kita nga ang krusada sa kagamhanan batok sa druga samot pang mosulbong niining tuig 2017. Gani, daan nang nanganti ang Presidente nga dili gayud siya mohunong hangtud nga ang katapusang illegal drug dealer matumba.

Apan, sa laing bahin, hinaut usab nga ang 2017 magdala og dugang kalamboan sa nasud aron mahaw-as ang kinabag-an gikan sa kalisod. Hinaut nga mas mosulbong pa ang pagsaka sa ekonomiya tungod sa padayong maayong klima sa pamumuhonan.

Labaw sa tanan, hinaut nga ang Bag-ong Tuig debuwenas kanatong tanan, gikan sa labing ubos nga sektor sa sosyodad hangtud niadtong mga magpapatigayon. Ug sa makausa, mabungahong Bag-ong Tuig kanatong tanan.