COVID-19 positive na mga Pinoy pwede nang umuwi sa Pinas - Malacañang

MANILA, Philippines — Pinapayagan na ng Inter-Agency Task Force (IATF) on Emerging Infectious Diseases na makapasok sa Pilipinas ang mga Filipino na gumaling na sa COVID-19 pero positibo pa rin sa pre-departure RT-PCR test, ayon sa Malacañang.

Ayon kay Cabinet Secretary at Acting Presidential Spokesperson Karlo Nograles, kailangan lamang na magprisinta ang mga biyaherong Filipino mula sa ibang bansa ng kanilang positive RT-PCR Test na kinuha 48 oras bago ang petsa o oras na umalis sa pinanggalingang bansa.

Dapat ding magpakita ng isang medical certificate mula sa isang licensed physician kung saan nakasaad na nakumpleto na ng pasahero ang mandatory isolation period at hindi na siya nakakahawa at pinapayagan na siya ng kanyang free movement maging ang kanyang pagbiyahe.

“Pangatlo, iyong positive RT-PCR test taken not earlier than 10 days but not later than 30 days prior to the date and time of departure from country or port of origin,” ani Nograles.

Pagdating nila sa Pilipinas ay  kailangan nilang suma-ilalim sa facility based quarantine base sa klasipikasyon ng bansa o teritoryo kung saan sila nangggaling at kanilang vaccination status.