Hadlok nga i-COVID

Niadtong Sabado ug Domingo, wa gyud sa kondisyon ang akong panglawas. Kapoy kaayo ug nagsige lang ko’g higda.

Nakahunahuna ko nga magpa-check-up og doktor, apan mipasuwabi ang akong kabalaka nga tingali unya og ingnon dayon nga nasakit ko og COVID-19.

Nagpamasahe ko pagka Domingo, ug medyo miarang-arang apan diha gihapon ang kakapoy. Nakahunahuna ko nga basin og napasmo ko kay dunay mga higayon nga dugay ko nakakaon.

Pila ka higayon nga sa opisina gyud sa Banat News ko magsuwat og column, unya hapon na ko nga makakaon. Moadto na sab sa DYLA alang sa akong programa sa radyo. Mao kadto nga nagpatuob ko, unya pagkahuman na og tuob, gihurot gyud nako’g kaon ang mga pinaig nga bugas ug gihigop ang sabaw niini.

Dayon, mihigda ko, ug anam-anam ko nga nakabantay nga miarang-arang ang akong pamati. Banabana nako, napasmo gyud ko. Tiaw mo, kon midangop pa dayon ko og ospital, sigurado nga ingnon dayon nila nga na COVID-19 ko.

Daghan sa akong mga higala ang mitug-an nako nga bisan sila nakasinati niining gitawag og “subaw.” Giubo ug sip-onon ka sab. Sa bata ba ko, nakasinati na ko nga hilantan, apan wa pay COVID-19 kaniadto.

* * *

Unsa ni katinuod nga ang mga bugas nga gipanghatag sa Kapitolyo ngadto sa mga biktima sa bagyo sa kalungsoran, mga bati og kalidad?

Karon ra ko mituki niining mao nga isyu kay daghan na ang mireklamo kabahin niini. Unya, may hulagway pa nga gipakita ang bati nga klase sa bugas.

May usa ka hulagway nga daghang bato nga naapil paggaling, ug may pagka lagumon.

Sus, kon manghatag man gani og bugas, kana sab nga arang-arang nga klase uy.

Kon ingon man gani niini nga dili maayo nga klase sa bugas ang gipanghatag, maisip mga gipakaubos nato ang mga tawo nga karong Mayo 9 maoy mopili kon kinsa ang palingkoron nila pagka gobernador.

Gipanid-an nako kon may reaksyon ba niining maong isyu si Gobernador Gwen Garcia apan wa man siya’y tubag. Nagpadayon pa man tingali ang pagpanghatag og bugas sa Kapitolyo, undanga na ang paghatag og bati nga matang sa bugas uy.

Kon ako’y hatagan nianang maong klase sa bugas, dili nako dawaton. Nakabasa ko og post nga bisan si kanhi Tourism Secretary Ace Durano nga kaatbang ni Garcia pagka gobernador miingon gyud nga usa ka pagyama-yama sa katawhan ang paghatag kanila og bati nga klase sa bugas.

Aw, kon mao nay inyong estelo, nasayod na ang mga botante kon kinsa’y ilang pilion pagka gobernador.