Permit muna bago COVID tests sa Pasay
MANILA, Philippines — Dapat munang kumuha ng permit mula sa Pasay City Health Office ang mga kompanya ng Philippine Offshore Gaming Operator (POGO) at pribadong sektor bago ang COVID testing sa kanilang mga empleyado. Ayon kay Pasay City Mayor Emi Calixto-Rubiano, alinsunod ito sa Republic Act 11332 o “Law on Reporting of Communicable Diseases,” at sa Department of Health (DOH) Administrative Orders No. 2020-0014 at No. 2020-0180.
Sa ilalim ng RA 11332, nakasaad na ang local government unit ang magsasagawa ng mandatory COVID-19 tests sa kanilang hurisdiksiyon at sa “partner with the private sector and other stakeholders to deliver these measures and programs quickly and efficiently.” Sa DOH administrative orders naman ay may itinakda namang alituntunin kung paano ang pagsasagawa ng COVID-19 tests ng mga DOH accredited facilities.
Dapat din aniya, na sagot ng kompanya ang testing kits, na nakasaad naman sa Section 7 ng Interim Guidelines on Workplace Prevention and Control of COVID-19 na inisyu ng Department of Trade and Industry (DTI) at Department of Labor and Employment (DOLE) noong Abril 30, 2020. Sa Executive order naman ng alkalde, kailangang magsumite ng letter-application sa City Health Office ang kompanya sa pagnanais na maisalang sa COVID-19 tests ang mga kawani. Isusumite naman ng City Health Office sa Office of the Mayor ang request para sa authorization na iisyu ng alkalde.
Sa mga lalabag sa executive order ay may multang hanggang P50,000 at kulong na hanggang 6 na buwan.
- Latest
