Tito, Vic & Joey, Phillip, Sharon, Alma, Helen, pasok sa Icon Awards ng 5th EDDYS

Sampung tinitingala at nirerespetong alagad ng sining ang bibigyang-pagkikilala sa gaganaping The 5th EDDYS (Entertainment Editors’ Choice) ng Society of Philippine Entertainment Editors (SPEEd).

Tulad ng mga nagdaang taon, 10 mahuhusay at itinuturing na haligi ng industriya ng pelikulang Pilipino ang pararangalan ng SPEEd bilang Icon awardees ngayong 2022.

Ito’y para sa hindi matatawarang kontribusyon at pagmamahal nila sa movie industry sa loob ng mahabang panahon.

Ang The 5th EDDYS Icon honorees ay sina Tito Sotto, Vic Sotto, Joey de Leon, Phillip Salvador at Roi Vinzon. Kasama rin sa bibigyang-parangal ang mga de-kalibreng aktres na sina Helen Gamboa, Divina Valencia, Elizabeth Oropesa, Sharon Cuneta at Alma Moreno.

Para naman sa mga special awards ng ikalimang edisyon ng EDDYS – ipagkakaloob ang Joe Quirino Award sa entertainment journalist at TV correspondent na si Mario Dumaual.       

Ang scriptwriter at dati ring editor na si Eric Ramos ang tatanggap ng Manny Pichel Award habang ang Rising Producer Circle award ay ipagkakaloob sa Rein Entertainment.

Ang Viva Films naman ang napili ng SPEEd bilang Producer of the Year.

Para sa Isah V. Red Award, pararangalan naman sina Gretchen Barretto, Kris Aquino, Alfred Vargas; Kapuso Foundation at Sagip Kapamilya.

Nauna nang inihayag ng SPEEd ang mga nominado para sa iba’t ibang kategorya ng The 5th EDDYS. The 5th EDDYS is presented by SPEED and Fire and Ice Media and Productions in partnership with Globe and in collaboration with Beautederm, National Commision for Culture and the Arts, Metropolitan Theater. Nathan Studios, Rep. Arjo Atayde, and Tanduay are sponsors. The event is supported by Live Stream Manila, Rep. Geraldine Roman, Carl Balita Foundation, and JFV Rice Mill. The auditing firm of Juancho Robles, Chan Robles & Company, CPAs, serves as vote auditor.

Katuwang din ng SPEEd sa pagdaraos ng The EDDYS ang Fire And Ice Media and Productions, Inc., ang kumpanyang itinatag nina Liza Diño at Ice Seguerra.

Magaganap ang ikalimang edisyon ng The EDDYS sa Nov. 27 sa Metropolitan Theater (MET) na ididirek ng OPM icon at award-winning singer-songwriter na si Ice Seguerra. Magsisilbi namang host ng event ang talent manager at prem­yadong TV personality na si Boy Abunda.

Ang pagbibigay ng award ng SPEEd ay isang paraan para hikayatin, lalong pataasin ang morale at patuloy na magbigay-inspirasyon sa Filipino filmmakers, producers, wri­ters, actors at iba pa na bumuo ng makabuluhan at de-kalidad na pelikula.

Ang SPEEd ay samahan ng mga entertainment editor ng major broadsheets at tabloids sa bansa, sa pangunguna ni ­Eugene Asis (ng People’s Journal) bilang presidente.