Sinulog Idol Season 14

CEBU, Philippines — Kompleto na ang 12 ka  finalists nga magtigi alang sa  ika-14 nga edisyon sa Sinulog Idol nga mahitabo karong Enero 2023 diha sa Fuente Osmeña Circle sa Dakbayan sa Sugbo. Ang maong kalihukan kay kabahin sa mga naglinya nga kalingawan samtang nagsingabot  ang kapistahan sa Balaang Bata nga si Senyor Santo Niño.

Bag-ong grano sa mga talento nga naggikan sa nagkadaiyang dapit sa Sugbo ang mopakita sa ilang abilidad sa pagkanta kun diin pito ka gabii na sab kini nga magsangka alang sa gikahinaman nga titulo nga mao ang Sinulog Idol Season 14 Grand Champion.

Kapin sa 100 ka mga inbidwal ang nisalmot sa  audition nga nahitabo niadtong Oktubre 22, 2022 sa Cebu City Sports Center, gihashasan pa gyud kini ngadto sa 40 , hangtud nga napili na gyud ang 12 ka  finalists.

12  finalists

1.) Marianne Mae Shanen Garciso, 21 — Lapu-Lapu City

2.) Hidle Lyn Resurrecion, 25  —Pardo  Cebu City

3.) Chriszandra Mae Pateres, 15 — Liloan, Cebu

4.) Mary Therese Jade Damos, 20— Bogo City, Cebu

5.) Yeza Karyl Mayol, 21— Liloan, Cebu

6.) Jaienne Braveres Suralta, 15— Lahug, Cebu City

7.) Dj Mae Dente, 23 — Talisay City, Cebu

8.) Raffy Buencorsejo, 23 — Carmen, Cebu

9.) Johnel Bucog, 19 —Talisay City, Cebu

10.) Dominic Quibido Jr., 20 —Talisay City, Cebu

11.) Jovie Loon, 20 — Pinamungahan, Cebu

12.) Maxell Muldez, 25 — Hipodromo, Cebu City

Ang 12 ka finalists ipaubos og nagkadaiyang workshops sa dili pa sila isangka aron nga mabaid gyud ang ilang abilidad. Gani, maingon nga dili ordinaryo ang maong lokal nga kompetisyon gumikan kay ang pagpaubos sa matag finalist sa nagkadaiyang workshops, magtul-id kini kanila aron nga mamahimong dekalidad nga mga performer sama sa mga nahimong mga mananaug sa prestihoyosong kompetisyon nga sila si Jacky Chang, Raechelle Faelnar, Ronna Jenn Lofranco-Cañete, Chingkie Maylon, KC Dilao, Jared Roble, Aian Uba, Arnold Badana, Jessa May Abaquita, Jehramae Trangia, ug Melody Hodgson.