Moira dela Torre sa pumanaw na driver: ‘Hindi ko alam paano magpaalam’
MANILA, Philippines — Nagdadalamhati ngayon ang singer-songwriter na si Moira dela Torre sa pagpanaw ng kanyang personal driver at matalik na kaibigan na si Kuya Baj.
Sa latest Instagram (IG) post ng 28-year-old na mang-aawit, ibinahagi niyang nami-miss na niya ang dating driver: mula sa kulitan hanggang maging sa seryosong usapan.
“Kuya Baj, salamat po sa lahat. Hindi ka lang naging mabuti na driver sa'kin, kundi mabuting kaibigan na rin. Lahat ng kaibigan ko at mahal ko sa buhay, mula banda hanggang kamag-anak, minahal mo rin,” ani Moira sa kanyang IG caption, Lunes.
“Hindi ko pa rin alam kung paano magpaalam sa isang katulad mo, Kuya Baj. Kaya magpapasalamat na lang ako sa'yo... sa pagtahan sa'kin sa mga araw na mag-isa ako at sa pag-patawa sa amin sa bawat pagkakataong mahanap mo.”
"Salamat sa pag-intindi, kuya, at sa pagbigay sa akin ng pamilya nung mga araw na pakiramdam ko mag-isa ako. Mami-miss ko tawa mo, Kuya Baj. Pati 'yung mga advice mo na minsan maka-Diyos, minsan bastos, pahinga ka na, kuya. Mahal na mahal ka namin. Miss ko na tawa mo. Salamat sa lahat. Love you, Kuya Baj,” dagdag pa niya.
Inulan ng pakikiramay ang naturang post ng malalapit na kaibigan, katrabaho sa showbiz at mga fans ng singer.
Tatlong taon na ang nakalilipas nang ibinunyag ng singer-songwriter ang tungkol sa kanyang mental health issues na kanyang ibinahagi sa kanyang 3.9 million Instagram followers.
Kamakailan umugong ang hiwalayan nila ng kanyang asawang si Jason Marvin Hernandez. Ikinasal sila noong January 2019 at naghiwalay matapos ang tatlong taong pagsasama. — Philstar.com intern John Vincent Pagaduan
- Latest