Janella ug Markus nagbuwag?

CEBU, Philippines — Niulbo karon ang taho nga nagbuwag na sila si Janella Salvador ug Markus Paterson apan nag-uban gihapon kini og puyo sa usa ka balay alang sa ilang anak. Wala modirekta og tubag si Janella kalabot sa maong taho apan nihangyo siya nga respetohon ang privacy nila ni Markus. Nagkabuwag na kaniadto sila si Markus ug Janella apan nag-uli rapud dayon.

Niulbo ang tsismis nga magsige og inom si Markus ug usa kini sa wala mauyoni ni Janella.

Pasidaan ni Awra

Adunay pasidaan si Awra Briguela sa mga tawo nga mahiligon og mga mahalong butang. Suma pa niya nga kinahanglan nga gamiton gyud kini ug dili lang  siya pang-display. Dugang pa ni Awra nga kinahanglan usab ang saktong pag-amping niini aron dili masayang ang kuwarta.

Sue ug Diego nataypan

Duna gyu'y mga lalaki nga isnabero nga dunay misteryosong personalidad.

Apan bisan paman niini, makabihag gihapon kini sa kasingkasing sa ubang babaye.

Ang maong senaryo kay makita sa bag-ong dalit sa Vivamax nga How to Love Mr. Heartless.

Ang maong pelikula kay gibidahan nila ni Diego Loyzaga ug  Sue Ramirez. Nisikad na kini niadtong Hunyo 17  ug nakadawat kini og mga positibong feedback.

Kasagaran sa mga komento nga nadawat niini kay nagkanayon nga dunay kusog nga chemistry sila si Diego ug Sue.

Atol sa mediacon , gibutyag nila ni Diego ug Sue nga komportable ra sila sa usag-usa sa dihang gigama ang maong pelikula sanglit taod-taod na sila nga maghigala.

Nagkauban usab sila kaniadto sa pipila ka Kapamilya projects.

Mao kini ang unang Vivamax project  ni Sue, samtang si Diego kay nakalugwa na kaniadto sa  Death of a Girlfriend, Bekis on the Run, House Tour, Dulo, The Wife, Adarna Gang, ug Greed.

Si  Jason Paul Laxamana maoy direktor sa How to Love Mr. Heartless. Nailhan si Laxamana kaniadto gumikan sa sikat niya nga mga pelikula nga sama sa “100 Tula Para Kay Stella,” “The Day After Valentine’s” ,"Just a Stranger” ug uban pa.

Sharon miplastada sa iyang new look

Gipakita ni  Megastar Sharon Cuneta ang bag-o niya nga hitsura kun diin nagkaniwang siya og maayo human nasakit og pipila ka adlaw.

Sa  Instagram account, gi-post niya ang hulagway inubanan sa iyang  short hair look. “Got sick these last few days. Lost weight,” tipik sa IG post ni  Sharon.

Paolo napungot sa bashers

Wala mahimout si Paolo Contis sa mga tawong nagsige og pamantay sa kasikas sa iyang kinabuhi. Usa sa iyang gikalagotan og maayo mao ang subling pag-trending sa pangalan nila ni Yen Santos.

Kahinumdoman nga gisumsoman sa iyang bashers ang pagpadala ni Yen og kaldereta ngadto kaniya.

Nagkanayon si Paolo nga wala man unta sila'y   gibuhat nga daotan.  Gitambangan niya ang bashers nila ni Yen nga mas labing maayo nga problemahon ang pagsaka sa presyo sa gasolina ug dili ang dagan sa ilang kinabuhi.

Todo pangandam sa kasal

Ang pag-pangandam   sa umaabot nila nga    kasal  maoy gikabisihan karon nila ni Vin Abrenica ug Sophie Albert. Wala hinoun gitino sa duha ang tataw nga petsa sa ilang kasal. Kahinumdoman nga gianunsyo nila ni Vin ug Sophie ang ilang engagement  sa unang bahin niadtong 2021. Una sila nga nagkaila niadtong  2012 sa dihang nagkauban sila sa  reality talent search sa TV5 nga “Artista Academy.”

Champion sa Masked Singer Pilipinas

Si  Kris Lawrence maoy napili nga  grand champion sa Masked Singer Pilipinas Season 2 sa final battle niini sa miaging gabii.

Ang maskara ug costume sa panda maoy gigamit ni Kris ug nailhan dayon ang iyang tingog  sa  judge detectives nga sila si Aga Muhlach, Bayani Agbayani, Matteo Guidicelli, Kim Molina ug Cristine Reyes.

Giisip sa singer nga ikaduhang "grand champion belt" ang  kadaogan niya sa Masked Singer Pilipinas Season 2 . Kahinumdoman nga siya ang  grand winner sa Season 2 sa Star in a Million, ang singing competition sa  ABS-CBN niadtong 2006.