Balik pelikula

Kasamtangang atua sa Baguio City si Aga Muhlach alang sa shooting sa iyang comeback movie diin ang producer mao si Dan Villegas ug ang director mao si Antonette Jadaone. Ang actor mismo maoy nipahibawo niini pinaagi sa Instagram kagahapon. Maisip kini nga comeback movie sanglit katapusan niyang pelikula mao ang Pinoy adaptation sa hit Korean movie Miracle in Cell No. 7, nga nalakip sa 2019 Metro Manila Film Festival. Nakahimo sab siya og laing pelikula kauban si Alice Dixon nga mao ang Nuuk, nga didto sa Greenland gimugna, ug gisalida sa Danish Film Festival.

Mahinayon diay

Nakugang ang mga botante sa Cainta, Rizal human nilugwa og kalit si RC Munoz didto aron mangampanya. Nagtuo sila nga dili na kini mahinayon sa iyang tinguha nga mapili pagka konsehal sa maong lungsod ubos sa partido sa kanhi PBA superstar nga si Alvin Patrimono. Kini kay taod-taod nga wala igkita si RC didto sanglit naglaag man siya sa nagkadaiyang estado sa Amerika ug nitan-aw pa sa concert sa BTS. Tulo ka rally nga wala siya ka apil.

Juju on the Go

Ipaambit ni Julia Barretto ang iyang hilig sa paglaag, pinaagi sa iyang travel series nga Juju on the Go nga makita pinaagi sa iyang Youtube channel sugod karong bulana. Ipakita ni Julia ang iyang mga laag sa nagkadaiyang dapit sa nasud ug sa abroad nga mopaambit og pagkaon, kultura ug kalingawan. Alang sa unang episode, ang iyang paglaag sa Bohol sa nilabay nga bulan maoy ipaambit ni Julia. Suma pa niya, gumikan sa pandemic, daghan kaayo siya og wala na nabuhat, ug karon nga mahimo na sab nga mo-travel iya nang tumanon ang iyang mga plano nga adtuon.