Kinsay atong tuohan

Sa Enero 28-31 nga Presidential survey nga gihimo sa Social weather Stations (SWS) si Bongbong Marcos nakakuha og 50 porsiyento. Nagsunod kaniya si Bise Presidente Leni Robredo nga nakakuha og 19 porsiyento, Senador Manny Pacquiao ug Mayor Isko Moreno nga nakakuha og 11 porsiyento ug Senador Panfilo Lacson nga may 6 porsiyento.

 Sa Pebrero 18-23 nga survey nga gihimo sa Pulse Asia, ang kanhi senador nga si Bongbong Marcos nakakuha og 60 porsiyento ug nagsunod kaniya si Bise Presidente Leni Robredo nga nakakuha og 15 porsiyento. Nagsunod kanila sila si Mayor Isko Moreno nga may 10 porsiyento, Senador Manny Pacquiao nga may 8 porsiyento ug Senador Panfilo Lacson nga may 2 porsiyento.

 Sa Abril 2-6 nga survey nga gihimo sa Octa Research, nagpabilin nga nag-una si kanhi Senador Bongbong Marcos nga nakakuha og 57 porsiyento ug gisundan siya ni Bise Presidente Leni Robredo nga nakakuha og 22 porsiyento. Si Manila Mayor Isko Moreno nakakuha og 9 porsiyento, Senador Manny Pacquiao may 7 porsiyento samtang si Senador Ping Lacson nakakuha og 4 porsiyento.

 Sa Google Trends nga Presidential survey as of 7:00 sa buntag niadtong Abril 18 bali ug lahi ang resulta. Nag-una si Robredo nga nakakuha og 46 porsiyento ug gisundan siya nila ni Bongbong Marcos ug Isko Moreno nga parihas nga nakakuha og tag 20 porsiyento samtang sila si Manny Pacquiao ug Ping Lacson nakakuha og 9 porsiyento ug 5 porsiyennto.

 Asa man ani nga resulta sa survey ang atong toohan? Ang nahisgotan nga mga survey agency pulos adunay kredibilidad ug ang mga resulta sa gihimo nilang mga political survey pulos tinuod.

 Ang resulta sa survey sa Google Trends sa Presidential Election sa America tali ni Hilary Clinton ug Donald Trump diin midaug si Trump ingon man tali ni Donald Trump ug Joe Biden diin midaug si Joe Biden nagpasabot lamang nga aduna pod kredibilidad ug katoohan ang resulta sa survey sa Google Trends.

Hinuon ang makasulbad aning bangi sa resulta sa survey sa pulos credible nga survey agencies mao ang silent majority nga motingog na sa Mayo 9 nga eleksiyon nga mao ang final survey.  Awhag lang nako sa mga botante, ayaw lang ninyo itutok ang inyong mga mata sa mga nag una sa survey kay ang ilang pag-una wala kana magpasabot nga sila na gayod ang pinakahaum ug pinakakuwalipikado nga modala sa renda sa kagamhanan. Nahitabo lang nga mas sikat sila kay sa uban.