PDP-Laban endorsement kay Marcos hindi nangangahulugan ng Duterte support
MANILA, Philippines — Tumatanggi pa rin ang Malacañang na ianunsyo kung ibabato na rin ni Pangulong Rodrigo Duterte ang suporta niya kay presidential candidate Ferdinand "Bongbong" Marcos Jr. — ito'y kahit inendorso na siya ng partido ng nauna na PDP-Laban.
Giit ni acting presidential spokesperson Martin Andanar, ang pag-endorso ng PDP-Laban kay BBM ay isang desisyon ng partido ngunit hindi raw ito nangangahulugang ganyan din ang desisyon ng presidente.
"That is a collegial decision [PDP-Laban endorsement] as a political party. But the president himself has not given any statement on the issue if he is or he is not supporting this or that [presidential bet]," ani Andanar, Martes, sa isang briefing.
"Antayin na lang po natin si Pangulong Duterte kung ano ang kanyang personal na desisyon... Ito ay malinaw na desisyon ng partido pero hindi malinaw kung ito rin ang gusto ni Pangulong Duterte."
Ang lahat ng ito ay nangyayari kahit na si Digong ang chairperson ng PDP-Laban faction na pinangungunahan ni Energy Secretary Alfonso Cusi.
Una nang sinabi ni Duterte sa dating panayam ni Andanar na nais niyang maging "neutral" sa ngayon pagdating sa mga kumakandidato sa pagkapangulo sa Mayo 2022.
"That is the president's decision. Sinabi naman niya right from the beginning... the president said that he would rather stay neutral. For us in the Palace, what is important to us is our president remains very relevant," banggit pa ni Andanar.
Aniya, patunay na hindi "lame duck" at "kiss of death" ang pag-endorso ni Digong lalo na't pare-parehong bukas sina Marcos, Bise Presidente Leni Robredo at Ka Leody de Guzman sa suporta ng presidente. Una nang sinabi ni Manila Mayor Francisco "Isko Moreno" Domagoso na umaasa pa rin siyang susuportahan ng pangulo ang kanyang kandidatura.
Ang vice presidential candidate na si Davao City Mayor Sara Duterte-Carpio, na tumatakbo sa pagkabise-presidente ng UniTeam Alliance ni Bongbong, ay anak ni Digong.
- Latest
