Ikaw na gyud!
Daghang nipakpak ug nalipay alang kang Heart Evangelista. Ang uban nahugyaw, human siya nag-upload og mga hulagway ug video clip diin kauban niya ang editor-in-chief sa Vogue Magazine sa Paris nga si Anna Wintour. Daghang nag-isip kang Wintour nga fashion icon, ug banggitan gyud kaniadto pa hangtud karon. Mismo si Iza Calzado nipakpak niini, ug nikomento og “Major” sa maong post ni Heart. Kadungan og breakfast ni Heart si Wintour niadtong nilabay nga adlaw didto sa Paris. Ang maong breakfast, mugna mismo sa Vogue Paris ug usa mga dinapit si Heart kinsa nahibalik na sab didto alang sa fashion event sa luxury brand Dior niadtong March 1. Niadtong January didto sab si Heart aron motambong sa Paris Fashion Week.
Start Up diay
Gibutyag ni Bea Alonzo ngadto kang Nelson Canlas sa 24 Oras niadtong Biyernes nga ang Pinoy adaptation sa trending Korean series nga “Start Up” maoy nakapatando niya nga hingpit nga mopirma og kontrata sa GMA7 niadtong June 2021. Suma pa niya, sa una pa lamang meeting nila, usa na ang maong proyekto sa mga gitanyag ngadto niya. Busa karon nga hapit na nila sugdan ang maong proyekto, naghinamhinam na siya og maayo. Si Alden Richards maoy iyang pares niining maong teleserye nga maoy iyang unang regular nga project isip kapuso.
Naglikay sa press
Gisalida na niadtong Biyernes sa VivaMax ang pelikula nga “The Last Five Years” nga gibituonan nila ni Meg Imperial ug Tom Rodriguez. Suma pa sa mga nakakita na, husto si Meg sa iyang deklarasyon nga mao kini ang labing nindot sa tanang nahimo na niya nga pelikula. Mag-live in sila si Tom ug Meg sa maong pelikula. Nibiya si Meg kang Tom kay sulod sa lima ka tuig, wala gyud kini hagda og kasal sa lalaki. Relationship movie ang maong proyekto. Apan sa tinuod nga kinabuhi, giingong nihangyo ang kampo ni Tom nga dili kini motambong kun ugaling adunay presscon. Pangagpas sa mga marites, naglikay si Tom sa press aron dili direkta nga mahinabi sa kabahin sa panagbuwag matud pa nila sa iyang asawa nga si Carla Abellana, tulo ka bulan human sa ilang kasal niadtong Oktubre.
- Latest
