Programa nila Kuya Kim, papalit sa Wowowin!

Kahapon ay formal nang namaalam si Willie Revillame sa kanyang programa na Wowowin sa GMA 7.

Nagpasalamat siya sa GMA at hindi niya raw malilimutan ang opportunity na ibinigay ng GMA 7 sa kanya. “I don’t want to say goodbye dahil sa industriyang ito there’s always a welcome back,” aniya.

Binanggit niyang ang offer ng mga Villar sa kanya ay pangarap niya noong nag-uumpisa pa lang sa industriya.

Nauna nang klinaro ni Willie sa kanyang programa noong Huwebes na hindi siya nanunulot ng talents.

Malinaw na ring ayaw niyang makipag-negotiate sa mga Villar para sa AMBS (Advanced Media Broadcasting System) habang may programa pa siya.

At ang papalit sa Wowowin sa GMA 7, ang Kapuso news magazine program na Dapat Alam Mo! simula ngayong Lunes, Pebrero 14, kasama ang mga anchor na sina Emil Sumangil, Patricia Tumulak, at Kuya Kim Atienza. “We will take this one day at a time, but God put us here for a purpose. Join Emil, Pat, and me as we set foot in this new territory. With God’s continued grace and your support, we will make it! Continue to support Dapat Alam Mo! 2.0. Mas pinalakas at mas pinaganda!” pagbabahagi ni Kuya Kim.

Dagdag pa ni Patricia, “Thank you, GMA, for placing your faith in us! God presented us another opportunity to showcase our gifts to reach out to a bigger audience. Can’t wait for all of you to see Dapat Alam Mo! Thrice the level of performance and good vibes from us.”

In all fairness, maganda ang naging pagtanggap ng viewers sa Dapat Alam Mo! mula nang magsimula itong umere sa GTV noong Oktubre kung saan kabilang pa raw ito sa top 20 news and public affairs programs ng 2021 base sa opisyal na data ng Nielsen Philippines.

At sa paglipat nito sa bago nitong tahanan, ipagpapatuloy daw ng Dapat Alam Mo! ang paghahatid ng serbisyo publiko sa pamamagitan ng mga segment nitong Serbisyo On The Spot, Shout Out, at SWAT (Serbisyong Walang Atrasan).

Samantala, good vibes at bagong kaalaman naman ang handog ng programa sa Kakabakaba, Take Eat Away, at  Dami Mong Alam Kuya Kim.

“Patuloy kaming magiging instrumento para makapaghatid ng impormasyon at tunay na serbisyo publiko – for God and country. Deus Vult! God Wills It!” ayon pa kay Emil.