Grabeng "trauma"

Naniguro siya alang sa iyang seguridad hinungdan nga wala siya muhunong dihang gigukod siya sa mga polis adtong Sabado sa gabii nga nisampot sa pagpusil sa mga otoridad sa ligid sa iyang sakyanan.

Kana maoy pamahayag sa aktor nga si Jake Cuenca nga hingpit nang nipadayag sa iyang habig sa exclusive interview ni MJ Felipe kaniya ug gipagawas sa TV Patrol adtong Martes.

Suma pa niya, wala nag-uniporme ang mga police, walay checkpoint, hinungdan nga labihan niyang hadloka, ug ang diha sa iyang hunahuna mao nga makapalayo siya sa kagubot.

Wala sab matud pa siya nagtuo nga siya diay gyud ang gigukod sa kapolisan, nihunong lamang siya pagkabati niya og wangwang sa sakyanan sa mga otoridad.

Ang istorya mao nga nabanggaan ni Jake ang sakyanan sa usa ka operatiba nga nipahigayon og buybust operation adtong tungora. Wala matud pa nihunong ang aktor, hinungdan nga gigukod siya.

Apan matud ni Jake, wala gyud siya nakabantay nga nakabangga diay siya. Wala sab matud pay lama nga makita sa iyang sakyanan isip timailhan sa nahitabo.

“Hindi ko talaga naramdaman yung ano, e, yung side-swipe, e, naguguluhan din kami kung sa'n nangyari yung bangga.

“Kasi in my car, there’s no paint from anywhere, there’s no damage in my car, aside from the damage that was caused by the gunshots.”

Giklaro ni Jake nga wala siya bilangoa, sukwahi sa unang nigawas nga mga balita. Suma pa niya, kaduha gicheck sa mga otoridad ang sulod nga bahin sa iyang sakyanan ug walay nakitang bisan unsa nga ilegal.

Dungan niini, gipasalig ni Jake nga tabangan niya ang delivery rider nga naigo sa saag nga bala gumikan sa pagpusil sa mga police sa iyang sakyanan. Una na nga namahayag ang PNP nga silay moabaga sa gastuhan sa maong rider.

Sa nilabay nga adlaw, hugtanong namahayag si PNP Chief Guillermo Eleazar nga manubag si Jake sa mga kalapasan nga nahimo niini atol sa maong hitabo.

Si Jake sa iyang bahin niingon nga labihan nga "trauma" ang iyang nahiaguman gumikan sa hitabo.