Cebuanas na sab!

CEBU, Philippines — Mga Cebuana beauty queens na sab ang nanghawod sa bag-o pa lamang gipahigayon nga Miss World Philippines didto sa Olangpo City adtong Domingo sa gabii.

Kini human ang pambato sa Cebu City, Tracy Maureen Perez mao gyu'y nakoronahan isip Miss World Philippines 2021.

Samtang ang representante sa Cebu Province, Shaila Rebortera, gikoronahan isip Miss Multinational.

Sa nilabay nga Huwebes, September 30, mga Sugbuanon sab ang nanghawod diin ang pambato sa Cebu City, Beatrice Luigi Gomez maoy nidaog isip Miss Universe Philippines 2021, samtang ang gikan sa Cebu Province, Steffi Aberasturi, nahimong second runner-up.

Sila si Perez ug Gomez managsama nga sakop sa Origin Management nga nagbase dinhi sa Sugbo ug gipanag-iya ni Sven Chua. Managsama sab sila nga nagtrain ubos sa Aces & Queens.

Sila sab si Aberasturi ug Rebortera, naggikan sa Stacy Models ni Stacy Lloren ug puros sab nagtrain sa Kagandahang Flores.

Dili na, bag-o sa natad sa pageant sila si Perez ug Rebortera. Si Tracy, 2nd runner-up sa Miss Cebu 2016, Top 6 sa Binibining Cebu 2017, ug pagsubli niyang salmot pagka-sunod tuig, nakoronahan siya nga Bb. Cebu Charity 2018.

Ikaduha na sab ni niyang salmot og Miss World Philippines. Unsa siyang nanimpad adtong 2019, diin nasulod siya sa Top 12. Si Michelle Dee ang narayna, nga maoy nikorona niya adtong Domingo. Gikan sa MWP, nitabok siya sa Miss Universe Philippines 2020, diin nasulod siya sa Top 16.

Gipangandaman gyud ni Perez ang iyang pagbalik karong tuiga sa MWP, gamit ang iyang kasinatian. Ug nagbunga ang tanan sanglit nangharos sab siya og special awards sama sa Miss Blue Water Day Spa, Miss Artopian International, Best in Swimsuit or Miss Bench Body, Miss Bench, ug Miss Dermfix.

Sa usa ka IG post sa nilabay nga mga bulan, gipadayag ni Perez nga dili gyud siya mohunong hangtud nga dili matuman ang iyang damgo nga mamahimong representante sa nasud aron mapakita niya ang kaanyag sa Pinay.

Sanglit 28-anyos naman siya, nanganti gyud si Perez nga kinahanglang hugyaw gyud ang resulta sa iyang katapusang beauty pageant nga gisalmutan.

Samtang si Rebortera, nakoronahan nga Sinulog Festival Queen 2018 ug Eat Bulaga's Miss Millennial sa samang tuig.

Sa pikas bahin, isip Miss World Philippines mao kini ang mga premyo ni Perez: PHP500,000 cash prize; PHP2-million worth of management contract ubos sa Arnold L. Vegafria talent management; movie contract kantidad og PHP500,000 ug endorsement sa usa ka cosmetics brand.

Gawas sa kadaugan nila ni Rebortera ug Perez, lain pang nakoronahan mao sila si Miss Supranational Philippines, Dindi Pajares; Miss Eco Philippines, Kathleen Paton; Reina Hispanoamericana Filipinas, Emmanuelle Vera; Miss Tourism Philippines, Trisha Martinez; Miss Environment Philippines, Michelle Arceo; ug Miss Eco Teen Philippines Tatyana Austria. First runner-up si Riana Pangindian ug Second runner-up si Ganiel Krishnan.

Labihan ka taas sa pageant diin nilungtad kini og dul-an pito ka mga oras hinungdan nga daghang nagyawyaw nga netizens. Nahagba si Perez sa iyang unang pagrampa isip MWP apan dali kaayo siyang nakatindog. Gibasul sa netizens ang kadugay sa pageant hinungdan nga naluya si Perez nga nisampot sa nahitabo.

LR si Ivana!

Nikabat og P12M ang kantidad sa diamond ring ni Ivana Alawi nga iyang gipakita sa iyang Youtube channel niadtong December nga maoy iyang birth month. Ang Ivana Moon ring, gimugna sa jewelry company diin si Ivana ang endorser. Dili gyud unta kadto baligya ug para lamang gamiton sa photo shoot ni Ivana. Apan suma pa sa jeweler nga si Drake Dustin Ivay, pipila ka buwan human sa ilang shoot, nilugwa og kalit si Ivana sa iyang opisina kay buot niining paliton ang 8-carat diamond ring. Suma pa ni Ivay, nagtuo siya og dili seryoso si Ivana, apan pagka- ugma nagpadala na kini og deposit. Kahinumduman nga niingon si Ivana nga ang maong diamond ring ang iyang labing mahal nga investment. Sige na matud pa siya og palit og singsing kaniadto, apan ang maong diamond ring maoy labing dako gyud niya nga napanag-iya. Investment matud pa kini niya kay sayud siya nga magkadugay, magkamahal ang kantidad sa alahas. Niingon pa si Ivana nga dili na siya magpaabot og lalaki nga moregalo niya'g singsing, siya na mismo ang mopalit alang sa iyang kaugalingon.

Okay ra

Wala pa nagkita si Lolit Solis ug Mark Herras human sa isyu tali nilang duha diin gibuking sa nahauna nga iyang gikasab-an ang nauwahi kay sa estado niini, bisa'g P30,000, wala ang aktor. Kanhi talent manager ni Mark si Lolit. Suma sa aktor, normal ra matud pa ang ingon niana ni Lolit sa iyang mga alaga ilabi na kun magmingaw sila, mugnaan og isyu aron mosaba ilang mga ngan. Wala ra matud pa kadto ni Mark, kinahanglan lang niyang motingog sanglit naapil na sa isyu iyang asawa ug anak. Pero, okay ra matud pa sila ug gani nagpaabot si Mark nga kun magkakita sila ni Lolit, sagpaon gihapon siya niini og hinay isip pangomusta. Nihawa na si Mark sa poder ni Lolit ug nakakontrata na siya og tulo ka mga tuig sa GMA Artist Center.

Nilugwa na, nagtrending pa

Trending si Bea Alonzo adtong Domingo kay hingpit na gyud siyang nakalugwa sa All Out Sunday, ang variety show sa GMA7, diin gihatagan siya og grand welcome isip kapuso. Gipadayag ni Bea nga malipayon siya kay daghan na siya og nahimamat nga mga kapuso nga mga bag-o niyang mga higala. Gipasigarbo ni Bea nga managhigala na sila sa rayna sa GMA7 nga si Marian Rivera, kinsa usa sa mga ni welcome niya pinaagi sa usa ka video greeting nga gipasupot niini.

Makakugang ang mando

Nakugang si 2013 Miss Universe runner-up Ariella Arida sa mga eksena nga gipabuhat ni direk Darryl Yap niya sa pelikulang Ang Sarap Mong Patayin. Human sa kissing scene nila ni Lassy Marquez, gisugo pud siya nga maghawkanay sila ni Kit Thompson ug kinahanglang kan-on niya ang baba niini. Ang nakahugyaw man gud kay didto na inig mismong mugna na nila sa eksena sila pahibaw-on unsay ilang kinahanglang buhaton. Apan nagpasalamat ra pud si Ariella kay daghan matud pa siya'g nakat-onan, ug nagkasuod sila'g maayo sa ilang shooting hinungdan nga mangatawa na lamang sila inig human.

Direk Chito for Darna

Ang banggiitang si Chito Rono ang napili sa ABS-CBN aron maoy modirek sa Darna TV series sa ABS-CBN nga bituonan ni Jane De Leon. Sa sunod bulan, kun dili man gani karong bulana ipahigayon ang lock in taping. Taod-taod na nga wala mo mugna og teleserye si Direk Chito. Lakip sa iyang projects sa ABS-CBN kaniadto ang Lastikman, Imortal ug Spirits.