Congrats, Alex!

CEBU, Philippines — Naglisud pagtuo si Alex Gonzaga sa kamatuoran nga siya maoy cover girl sa Harper’s Bazaar Vietnam July 2021 issue nga 10th  Anniversary Edition sa maong magazine. Post niya sa iyang IG account niining bag-o lang:  Please pinch me. This is not even in my checklist but grabe!!! Thank you Lord for using mama @carissacielomedved to make this possible! HARPER'S BAZAAR VIETNAM @bazaarvietnam 10th Year Anniversary Edition July 2021 Issue.” Lakip sa mga ni-congratulate ni Alex mao ang iyang igsuon nga si Toni, si Karen Davila ug Melai Cantiveros.

Horror trilogy

Maghiusa og pwersa sila si Aiko Melendez, Kim Chiu ug Beauty Gonzales sa horror trilogy nga “Huwag Kang Lalabas” nga ubos sa Obra Productions sa direksyon ni Adolf Alix Jr.  Sa first episode, si Aiko maoy bida kauban si Joaquin Domagoso nga midala isip iyang anak; madre ang role ni Beauty sa second episode kauban sila si Matet de Leon ug Elizabeth Oropresa ug sa third episode nga giulohan og Hotel, kauban ni Kim si Jameson Blake. Didto sa Baguio City ang shooting niini.

Direk Ice

Nagsaulog si Ice Seguerra sa iyang 34th year sa showbiz pinaagi sa paghimo og pelikula diin siya maoy director. Suma pa niya sa iyang IG post wala siya nagdahom niining maong oportunidad apan iyang natugkad nga mao kini makapalipay niya ug buot niyang buhaton gyud. "I am celebrating my anniversary on the set, behind the scenes, in the director's chair. And this is exactly where I want to be," tipik sa post ni Ice. Wala pa niya gidetalye unsa ang maong proyekto.

Wow, Daniel!

Pasok sa prestihiyosong Locarno Film Festival sa Switzerland ang pelikulang “Kun Maupay Man It Panahon (Whether the Weather is Fine) nga gibituonan ni Daniel Padilla kauban si Charo Santos Concio. Mao ra kini ang bugtong pelikula gikan sa Pilipinas nga nalakip sa maong film festival karong tuiga. Ang maong pelikula ni Carlo Francisco Manatad gimugna didto sa Tacloban City ug nagpakita sa kadaut nga namugna human sa bagyong Yolanda.

Mapangahason nga Sharon!

Lahi gyud nga Sharon Cuneta ang makita sa pelikula nga “Revirginized” sa Viva Films nga ubos sa direksyon ni Darryl Yap ug isalida pinaagi sa Vivamax sa August 6. Bulgar ang pipila ka mga pulong nga gibatbat ni Sharon dinhi niining romantic-comedy diin mapangahas sab ang iyang mga eksena kauban si Marco Gumabao.

Dili makigtigi

Wala matud pa sa hunahuna ni Alden Richards ang makigkumpetensya sa ubang shows busa wala siya nakabatyag kaayo og pressure nga matupngan kun dili man nila malabwan ang kalampusan sa First Yaya sa GMA7 primetime sa paghulip na sa iyang teleserye nga “The World Between Us” sugod kagabii. Kanunay nga number sa primetime rating ang First Yaya, apan matud ni Alden basta kay gibuhat nila ang tanan aron mahimuot ang ilang teleserye ug mao ni importante alang niya. Kauban ni Alden dinhi sila si Tom Rodriguez ug Jasmine Curtis Smith sa direksyon ni Dominic Zapata.

Si Sanya unta

Si Sanya Lopez diay ang original choice sa horror trilogy film nga Huwag Kang Lalabas apan natunong matud pa sa final promo alang sa First Yaya ang shooting niini, hinungdan nga wala na kini nahinayon ug si Kim Chiu ang gipuli. Dakong kalipay sa production team nga si Kim ang nahulip sanglit mao kini nagpasikat sa “Bawal Lumabas” nga linya nga nahimong kanta ug teleserye. Hasta si Kelvin Miranda nagka problema sab sa schedule hinungdan nga si Joaquin Domagoso ang gihulip isip anak ni Aiko Melendez sa first episode niining maong trilogy.

CocoJul spotted!

Human giangkon ni Julia Montes nga malipayon ang iyang kasingkasing karong panahona, subli silang nasigpatan nga nagkuyog ni Coco Martin didto sa Greenhills niadtong July 2. Gani gi-post pa sa usa ka tindahan nga ilang gisudlan ang hulagway nila ni Julia ug Coco, diin ginganlan sila aron maklaro gyud sanglit nag mask man ang duruha. Una silang nasigpatan nga nagkuyog didto sa Boracay sa nilabay nga mga bulan. Dugay na nga gidungog ang relasyon sa duruha.

“My Amanda”, hapit na

Sa July 15, na isalida sa Netflix ang pelikula nga “My Amanda” nga gibituonan nila ni Alessandra de Rossi ug Piolo Pascual. Si Alex sab ang scriptwriter ug director sa nahisgutang pelikula. Dili na bag-o si Alex sa Netflix sanglit nisikat og maayo ang pelikula nila ni Paolo Contis nga “Through Night & Day” nga gisalida sa maong streaming app sa wala pay pandemic.

Kapamilya series sa Africa

Dugang duha ka mga teleserye sa ABS-CBN ang makita na didto sa Africa pinaagi sa Startimes channel. Kini mao ang Sandugo nga gibituonan nila ni Ejay Falcon ug Aljur Abrenica, ug sa July 18, mulugwa sab didto ang La Luna Sangre nga gibituonan nila ni Daniel Padilla ug Kathryn Bernardo diin may special participation sila si Angel Locsin ug John Lloyd Cruz. Una na nga gisalida didto ang FPJ’s: Ang Probinsyano. Nasayran nga makita sa 41 ka mga nasud sa Africa ang mga salida sa Startimes.