Sunod semana na matud pa pormal nga ipaila si Pokwang isip labing bag-ong kapuso talent. Ang tsika, malakip siya sa prequel sa Pepito Manaloto. Gawas kang Pokwang naa na sab sa GMA7 matud pa si Beauty Gonzales. Sa usa ka mediacon, gipadayag ni Julie Ann San Jose nga welcome kaayo sa All Out Sunday ang mga kanhi kapamilya stars sama nila ni Pokwang ug Beauty.
Latest project
Nag-zoom meeting sila si John Lloyd Cruz ug Bea Alonzo sa nilabay nga adlaw, dili aron tukion ang ilang reunion movie, kundili alang sa restoration (himuon nang digital version) sa ilang 2010 movie Miss You Like Crazy. Kauban nila sa meeting sila si direk Cathy Garcia Molina, screenwriter Vanessa Valdez ug ABS-CBN Sagip Pelikula head Leo Katigbak. Wala nahisgutan unsa nay kalambuan sa ilang reunion movie sa Star Cinema nga mao ang “No Goodbyes.”
“Done deal” na lagi!
Nisamot ka kusog ang tsika nga nasagap sa PEP Troika nga matud pa “done deal” na gyud ang pagbalhin sa kanhi mga pango sa Star Magic nga sila si Mr. M ug Ms. Mariole Alberto sa GMA7. Buot pasabot sa tinubdan nga ipahibawo na sa GMA7 sa dili madugay ang maong kalambuan.
Nagkuyog sa Boracay…
Kun ang mga hulagway nga gi-upload sa usa ka hotel staff ang basehan, maingon nga nagkuyog karon didto sa Boracay sila si Heaven Peralejo ug Kiko Estrada. Duha—sa usa kauban niya si Heaven ug sa usa pa kauban niya si Kiko-- ka mga hulagway ang gi-upload sa babaye nga hotel staff. Maingon nga kuha ra sa usa ka lugar ang maong mga hulagway. Big deal ang maong mga hulagway ngadto sa mga netizen sanglit si Heaven ang gitumbok nga third party sa break-up nila ni Kiko ug Devon Seron sa nilabay nga tuig. Co-stars si Kiko ug Heaven sa kanhi ABS-CBN teleserye Bagong Umaga. Hugtanong gihimakak ni Heaven ang maong pasangil.