“Mag-focus ka sa sarili mo”

CEBU, Philippines — Si Andrea Torres ang celebrity guest sa The Boobay & Tekla Show sa GMA7 niadtong Domingo diin gipangayuan siya og tambag unsaon pag-move on human sa napakyas nga relasyon.

Wala malimod nga nagbuwag sila si Andrea ug Derek Ramsay niadtong November human usab sa kapin tuig nga relasyon.

Saysay ni Andrea, malipayon ang iyang kasingkasing karon ug walay pangabubho nga gibati. Kun aduna may gani siyay gimahayan, kana mao ang nawagtang nga panahon diin wala na mabuhat ang mga plano gumikan sa Covid.

Ug ang tambag ni Andrea ngadto sa nahiagom og break-up sama niya: “Mag-focus ka sa sarili mo. Gumawa ka ng mga bagay na nagpapasaya sa 'yo tsaka mga bagay na hindi mo pa nata-try dati.”

“I-discover mo pa yung sarili mo, kumbaga.” Dili pa siya andam nga mahigugma pag-usab.

“Ako, hindi pa. Parang gusto ko… usually gusto ko pag ganito, binibigyan ko talaga ng time yung sarili ko para maging mag-isa.

"Para kapagka dumating yung next, all out ulit."

“Kwek-kwek”, paborito ni Abena…

Filipino by heart ang Ghanian-American nga si Abena Appiah kinsa bag-ong nakoronahan isip 9th Miss Grand International didto sa Thailand niadtong Sabado sa gabii, ug maoy nipildi sa pambato sa Pilipinas nga si Samantha Bernardo. USA ang gidala nga bandera ni Abena sa MGI.

Una niini, Pinoy ang nag-train kang Abena alang sa nahisgutang pageant, ug mga Filipino designers sab ang nitabang kaniya. Managsama sila og training camp ni Bernardo—KF o Kagandagang Flores.

Tipik sa post ni Rodin Gilbert Flores, pango sa KF, niadtong Sabado sa gabii nagkanayon:  And the last two standing ladies in Miss Grand International 2020 are proudly KF trained…”

Managhigala sila si Bernardo ug Abena, ug nasaksihan ang ilang ka suod dihang gihapak hapak ni Samantha si Abena dihang gideklara sila isip top 2 candidates.

Dili na sab bag-o sa natad sa indigay sa kaanyag si Abena. Niadtong 2014, siya ang pambato sa Ghana sa Miss Universe pageant nga gipahigayon didto sa Amerika. Ka batch ni Abena si MJ Lastimosa. Gi-follow ni MJ si Abena gumikan sa inspirational posts niini sa Instagram.

Niadtong 2019, nalingaw ang mga Pinoy kang Abena dihang nianhi siya sa nasud isip pambato sa Ghana sa Miss Earth pageant. Flight attendant ug anti-bullying advocate si Abena. Batasan na gyud niya nga kat-onon ang lengguahe sa mga nasud diin ipahigayon ang beauty pageant nga iyang salmutan.

Viral ang video clip sa ABS-CBN interview kang Abena niadtong 2019 diin nipauwan siya og Tagalog comedy lines sama sa “Ang batang malakas kumain... ay laging may gana”, ug ““Gumamit ng tabo, timba at palang-ghana!’”

Recording artist sab si Abena. Nisatmot siya sa X-Factor 2012, ug aduna siya’y tulo ka singles sa Spotify. Abena Akuabi ang gidala niya nga ngalan.

Niadtong March 2020, dihang dayon na nga ipahibawo nga musalmot siya sa MGI,nagkanayon si Abena sa usa niya ka post: “kailangan ko ng ilang kwek kwek ngayon.”

Nihangyo gyud

Giangkon ni Andrea Brillantes nga nihangyo gyud siya sa ABS-CBN nga unta sa sunod niyang project, buotan na ang iyang role o sukwahi na sa iyang character isip ang kontrabida nga si Marga Bartolome sa sikat nilang soap opera kaniadto nga “Kadenang Ginto.” Ug gidungog sa management ang iyang hangyo pinaagi sa primetime series nga “Huwag Kang Mangamba” nga nagsugod na kagabii diin buotan ug kugihan ang iyang character apan buta.

Wow, Soliman!

Atua sa Romania ang respetadong actor nga si Soliman Cruz alang sa shooting sa international movie “To The North” diin siya maoy bida. Mga foreigner ang iyang kauban sa maong pelikula nga kabahin sa mga seaman. Saysay sa 58-anyos nga si Soliman nga wala niya hunahunaa nga siya maoy bida aron dili maapektuhan ang iyang performance. Maoy iyang giisip nga grupo sila ug importante ang usag-usa aron magmalampuson.

Mabalaw og pugong

“Grateful” ug “blessed” si RK Bagatsing nga nalakip siya sa inspirational series nga “Huwag Kang Mangamba” diin ka eksena niya ang iyang mga idolo ug girespeto nga mga banggiitan sama nila ni Sylvia Sanchez, Eula Valdez ug Nonie Buencamino. Niya pa, usahay mabaw siya og pugong nga dili mogawas ang iyang pagka fan kun ang mga nahisgutan na ang iyang ka eksena.

Kinsa man gyud?

Giatangan pa hangtud karon kun matinuod ba ang huhungihong nga ang Crown Artist Management ni Maja Salvador na maoy modumala sa nagbalik showbiz nga si John Lloyd Cruz. Nasayran nga adunay mga kompaniya nga interesado kang Lloydie isip endorser, apan blangko pa kang kinsa sila makig negotiate. Nitumaw ang taho nga si Maja na maoy manager ni Lloydie gumikan sa kasuod sa duruha. Apan si Maja sa usa ka interview igo lamang nipahiyom kabahin niini ug nisaad nga ipaila na unya nila sa dili madugay ang mga artista nga sakop na sa ilang bag-ong talent agency.