Angel, pinanigan si Vice sa bakuna

Wala namang sinabing ano pa man si Angel Locsin, pero hindi niya naiwasang mag-comment na “ayos ang baklang komedyante ano, pinaglalaban iyong tama at may malasakit sa tao.”

Mabilis ang reaksyon ng mga nakabasa sa kanyang comment na nagsabing ipinagtanggol lang ni Angel si Vice Ganda. Nagsimula lang naman ang controversy sa naging comment ni Vice, na kung doon nga raw sa ginagamit nating sabong panlaba ay mapili tayo eh, doon pa kaya sa bakuna hindi tayo dapat mamili. Kung iintindihin mo ang sinabi niya, hindi naman iyon laban kanino man. Ang sinasabi lang niya, may choice nga ang mga tao na mamili kung anong bakuna ang gusto niyang isaksak sa kanya. Kung hindi siya sigurado sa gustong isaksak sa kanya, maaari siyang tumanggi. After all si Vice naman, may pera iyan kahit na papaano, hindi naman iyan aasa sa libreng bakuna. Tiyak na magbabayad iyan.

Iyong comment ni Vice, sinalubong na naman ng hindi magandang comment na “sino ba ang dapat paniwalaan, iyong mga siyentipiko o iyong komedyante.”

Doon naman nag-react si Angel, kasi nga ang sinasabi naman ni Vice ay practical lang, at masasabi niya talaga bilang isang tao, at siguro naging masama sa pandinig ni Angel iyong para bang ibinaba na naman ang level ng komedyante.

Sa show business, kasabihan na ngang pinakamatalino ang mga komedyante dahil kung hindi ay hindi nila magagawang patawanin ang publiko. Madali raw ang drama, kasi mas madaling magpaiyak kesa magpatawa. Ngayon kung mamaliitin nga naman ang mga komedyante, dahil sa komedyante lang sila, mali iyon.

Marami ring nagagawang iba ang mga komedyante. Madalas sila ang nangunguna sa pananawagan para sa tulong kung may mga disaster. Kadalasan, dahil sila nga ang mas malaki ang kita, sila ang unang nagbibigay ng donasyon. Hindi na rin siguro kailangang banggitin, sila ang nagbabayad ng mas malaking tax.

Kaya lang naman siguro sumabat si Angel, kasi mukhang mali naman talaga iyong minemenos nila ang mga komedyante. Iyan ngang festival noong mawala sina Vice Ganda at Vic Sotto, nakatayo ba? Hindi ba noong 2016 ay may mga sinehan pero bagsak. Nitong 2020, bagsak na bagsak.

Jomari at ex, nagiging madrama

Hindi matatapos ang pagpapalitan ng bintang nina Jomari Yllana at ng kanyang ex-live-in partner na si Joy Reyes. Nagsimula si Joy sa pagsasabing hindi raw nagsusustento si Jomari sa kanilang dalawang anak, at hinayaan pang maputulan sila ng serbisyo ng Meralco. Gumanti naman si Jomari sa pagsasabing lahat naman daw siya ang nagbabayad hanggang sa mainis lang siya nang malaman niya na pati gatas na binibili niya para sa kanyang mga anak ay ibinebenta online.

Lumaki pa ang sagutan nang may magsabing dalhin na raw kay Tulfo ang problema. Hindi naman magawa iyon ni Joy dahil alam niyang nakahanda ang kampo ni Jomari at kasama na roon ang mga dating yaya ng kanyang mga anak na tetestigo laban sa kanya, “dahil pinaalis ko sila.”

Dapat iyan mag-usap silang dalawa lang nang walang makikialam. Kung hindi,walang katapusan ‘yan.

Female star na ‘di matuluy-tuloy ang pagbibida, inoproblema ng direktor ang akting

“Umaasa kang maging bida hindi mo mapatino iyang pag-arte mong lintik ka,” sabi ni direk sa isang female star na noon pa sinasabing gagawin na ngang bida sa isang malaking pelikula. Pero maski nga sa project na iyon ay hindi siya matuluy-tuloy dahil hindi nga siya marunong umarte. Kaya ang naisip ng management ay isama na muna niya sa ibang pro­jects para masanay kahit na papaano bago nga sumabak na bida.

Kaso kahit na sa mas maliliit na project, kahit simpleng pag-arte lang ang kailangan, nakukunsumi sa kanya ang mga director.

“Parang hindi niya alam na sa bawat oras na ma-delay kami mala­king gastos na. Hindi niya tinuan ang pag-arte niya. Maganda nga siya pero sa artista hindi puwede ang maganda lang,” sabi pa ng nakukunsuming si direk.

Kung ganoon nga ang sitwasyon, bakit pinipilit pang maging artista, at bakit bida pa?