It’s Showtime sa Zoe TV….

CEBU, Philippines — Nibuto ang taho niadtong Domingo sa gabii nga karong Sabado na, October 10, makita sa Zoe TV ang It’s Showtime sa ABS-CBN.

Suma pa sa tinubdan ni Jojo Gabinete sa PEP, mopalit og oras ang ABS-CBN sa maong channel nga makita sa free tv (buot pasabot dili na kinahanglan mo-subscribe sa cable), ug gawas sa It’s Showtime, isalida sab dinhi sa Sunday noontime show nga ASAP.

Apan wala pay opisyal nga pamahayag ang Kapamilya Network kabahin niini. Ang labing bag-ong kalambuan lang mao nga gidugang na ang Zoe TV sa mga channel nga makita sa Skycable sugod kagahapon.

Apan kun mahinayon gyud ang It’s Showtime karong Sabado sa Zoe TV, sungangon niini ang bag-ong noontime show sa TV5 nga mao ang Lunch Out Loud (LOL), diin hosts sila si Billy Crawford ug Alex Gonzaga.

Ang tsika pa, ang founder ug chairman emeritus sa Star Magic nga si Mr. M o Johnny Manahan maoy producer  sa LOL. Siya sab ang director sa Sunday Noontime Live nga giingong magsugod na karong October 18, diin sila si Piolo Pascual, Catriona Gray ug Maja Salvador maoy mga host.

Apan ang nahisgutang mga shows, dili iyaha sa TV5 mismo, kundili, ubos kini sa Brightlight Productions isip blocktimer.

Samtang laing tsika ang nibuto sab kagahapon nga nagkanayon nga dili pa pinal ang kasabutan sa ABS-CBN ug Zoe TV kay wala pa gyud magkasabot ang duha ka mga habig sa oras nga ibaligya sa nauwahi ngadto sa nahauna.

Nasayran nga ang Zoe TV mao sab ang gigamit sa GMA7 kaniadto isip QTV Channel.

Dating

Four months dating na matud pa sila si Lee Jung Suk ug Sandara Park. Ang tsika nga nibuto kagahapon mao nga niduaw gyud si Sandara kang Lee Jung sa military camp diin kasamtangang nagkompleto sa iyang military service ang actor.  Lakip sa mga salida ni Lee Jung mao ang V.I.P, R2B: Return To Base ug The Face Reader. Si Sandara, unang nisikat dinhi sa Pilipinas human siya nahimong runner-up sa Star Circle Quest sa ABS-CBN, ug nipauli sa South Korea, diin nalakip siya sa girl group nga 2NE1.

Most followed

Nikulit og kasaysayan si Lee Min Ho niadtong Domingo, isip labing unang Korean celebrity nga nakaangkon og 20 million followers sa Facebook ug Instagram. Aduna siyay 3 million followers sa Twitter ug  28.63 million followers sa Chinese microblogging site Weibo.

Lock in

Tag tulo ka semana ang lock-in taping alang sa casts sa “Init Sa Magdamag”  didto sa Tanay Rizal. Mao na kini ilang schedule hangtud nga mahuman og himo ang maong teleserye nga bida si Yam Concepcion ug leading men niya sila si Gerald Anderson ug JM de Guzman.

Bagong Umaga

“Bagong Umaga” na ang title sa teleserye sa ABS-CBN nga iyaha unta ni Julia Barretto. Mga bida niini sila si Barbie Imperial, Yves  Flores, Heaven Peralejo ug Tony Labrusca.

Kaya Pa

Balik trabaho na si Edu Manzano niadtong Domingo nga maoy pagsugod sa production sa pelikulang Mamamasapano, diin siya maoy modala sa papel ni General  Benjamin Magalong, kinsa maoy chairman sa PNP Special Board of Inquiry niadtong higayona.  Ganahan kaayo si Edu sa maong pelikula ilabi na nga sundawo sab siya kaniadto, ug suod niya nga higala si Magalong human sila nagkaabot sa Philippine Military Academy kaniadto. Lakip si SAF Chief Getulio Napenas Jr., higala sab ni Edu.

Hinungdan nga excited kaayo siya niining maong pelikula kabahin sa Mamasapano Clash, ug gideklara niya nga bisan sa edad niya nga 65 anyos karon, kaya pa kaayo niyang motrabaho.

Kapamilya Forever

Bisan pa og sa TV5 na siya makita puhon, gideklara ni Beauty Gonzales nga magpabilin siyang Kapamilya diha sa iyang kasingkasing. Hinuon, blocktimer ra ang teleserye nga “I Got You” diin bida si Beauty kauban sila si Jaine Oineza ug RK Bagatsing. Iya sa Brightlight Productions ang maong teleserye.