'Malala na': John Regala inaming may liver cirrhosis, umapela ng tulong

MANILA, Philippines — Nahihiya man, emosyonal na kumatok sa may mabubuting puso ang beteranong aktor na si John Regala bunsod ng iniindang karamdaman.

Lunes kasi nang kumalat ang litrato ni John, 55, matapos saklokohan ng isang Grab Food driver sa Lungsod ng Pasay. Nahilo at nanghina kasi ang aktor habang hinihintay ang isang nurse.

Basahin: Aktor na si John Regala sumama ang lagay, sinaklolohan ng deliveryman sa Pasay

Una nang naibalita na tuturukan sana siya ng gamot para sa sakit na gout. Pero sa panayam ng TeleRadyo, Miyerkules, lumalabas na mas malala pala ang kinakaharap na sakit ng artista.

"Malala na ang aking liver cirrhosis. Sugat-sugat na ang aking atay, at may tubig na ang aking tiyan at kailangang matanggal... 'yon," nabubulol na pagsabi ng beteranong action star kanina.

"Ako po ay nahihiya pero kakapalan ko na po ang mukha ko. Bawat tao naman po ay dumadaan sa ganitong sitwasyon. Sana po kung hindi naman kalabisan sa inyo, pakitulungan naman po ako. Nagpapakumbaba po ako ng labis labis. Gusto ko lang po talagang makapaghanapbuhay."

Sa parehong panayam, inamin ni Regala na nabangga pa niya ang motorsiklo ni Carlo Clariza, ang driver na tumulong sa kanya noong isang araw, sa dahilang hindi pa siya kumakain nang maayos sa loob ng 13 araw.

Aniya, ito raw ang dahilan kung bakit hilong-hilo siya at nadatnan sa ganoong kondisyon.

"Bihira 'yung ganoong [tumutulong] kaya maraming maraming salamat sa'yo. Tinatanaw kong utang na loob 'yun," dagdag pa niya.

Wika ni Clariza, hindi niya iniwan basta ang aktor nang kanyang mamukhaan hanggang sa asikasuhin ng mga tanod, pulis at health workers.

"[M]asakit lang isipin na Ang dating idolong kontra bida ay NASA ganyang kondisyon... [K]aya mas minabuti ko munang Hindi umalis hanggat di pa siya naaasikaso kahit na ako'y may deliver pa," sabi ni Clariza.

Ipinaskil din ng netizen na si BemEdz Santillan Torres sa Facebook ang kinasasapitan ng aktor, lalo na't naka-dextrose, hirap maglakad at iniwan na raw ng asawa si Regala.

Ilang personalidad naman na ang nangako ng tulong sa batikang aktor, na matatandaang hinirang na "Best Supporting Actor" sa 2011 Metro Manila Film festival para sa pelikulang "Manila Kingpin: The Asiong Salonga Story."

Ilan diyan ay sina Ang Probinsyano party-list Rep. Ronnie Ong at TV5 broadcaster na si Raffy Tulfo.

"Sa ngayon po, magpi-pledge ako. Magbibigay ako ng P100,000 at bukod pa ho diyan magbibigay ako ng gamot, groceries para sa’yo. At kung ano pa po maitutulong namin, ibibigay ko pa po," banggit ni Tulfo sa kanyang palatuntunan. — may mga ulat mula sa News5