DDS noon, kritiko na ngayon: Jason Abalos binira si Duterte sa gasoline disinfectant 'joke'
MANILA, Philippines — Hindi nagustuhan ng GMA-7 actor na si Jason Abalos ang payo ni Pangulong Rodrigo Duterte sa mga nais mag-disinfect ng gamit na face masks, bagay na maaari pang makasama sa magsusuot kaysa makatulong sa gitna ng coronavirus disease (COVID-19) pandemic.
Ika-21 ng Hulyo kasi nang sabihin ni Duterte ang sumusunod para sa mga gustong i-reuse ang face masks ngunit walang alcohol o lysol:
"[I]babad mo ng gasolina o diesel, putanginang COVID na ‘yan. Hindi uubra ‘yan diyan. Totoo. Kung wala kayo — if you want to disinfect, maghanap ka ng gasolina. Ibabad mo lang iyong kamay mo."
Kahit na "joke only" lang ito sabi ni presidential spokesperson Harry Roque, init na init ang ulo ni Jason sa kontrobersyal na strongman sa dahilang malapit ang isyu ng COVID-19 sa kanyang puso.
"Namatay ang kaibigan kong pediatric surgeon dahil sa covid, tapos may panahon pa kayong mag joke??" sabi ng Kapuso actor, Biyernes.
"Pagbabago ang ginusto ko nong binoto kita hindi panggagago!"
Namatay ang kaibigan kong pediatric surgeon dahil sa covid, tapos may panahon pa kayong mag joke?? Pagbabago ang ginusto ko nong binoto kita hindi panggagago!
— jason abalos (@thejasonabalos) July 23, 2020
Joke talaga to sila! ???????? https://t.co/tz6WO4Jqsh
— jason abalos (@thejasonabalos) July 23, 2020
Unang nakilala si Jason matapos sumali sa reality-based talent competition na "Star Circle Quest (Season 2)" sa ABS-CBN ngunit kasalukuyang isang Kapuso at bahagi ng GMA Artist center.
Si Abalos ay ilan lamang sa mga Kapuso at Kapamilya celebrities na vocal ngayon sa kanilang kritisismo sa presidente kaugnay ng iba't ibang isyu gaya ng COVID-19 response, hindi pagkaka-renew sa prangkisa ng ABS-CBN at Anti-Terrorism Act of 2020.
Ang "biro" ni Duterte (na kanyang sinambit nang mukhang seryoso) ay una nang hinubaran bilang walang batayan ni Department of Health (DOH) Undersecretary Maria Rosario Vergeire matapos niyang sabihing hindi dapat ginagamitan ng gasolina ang mga face masks.
Sa katotohanan, ni hindi nga raw maaaring basain man lang ang ilang uri ng face masks sa dahilang mawawala ang bisa nito na magsala ng virus mula sa hangin.
"Ang ibang mask pwede nating labhan paulit-ulit katulad ng cloth mask at dapat natin labhan every day pagkatapos gamitin," wika ni Vergeire.
"Yung surgical mask and N95 mask, (these are for) single use only. Hindi pwede hugasan, may components ang mga mask natin na parang mga certain filtering mechanism na pag hinugasan o binasa, mawawala (ang) effect."
Video na may kaugnayan:
- Latest