Nakapamalikas og ahat

CEBU, Philippines — Nakapamalikas  gyud si Angeline Quinto sa iyang mga tweet gumikan sa kapungot sa hukom sa mga  kongresista nga dili i-renew ang franchise sa ABS-CBN.  Suma pa ni Angeline nga louy kaayo ang mga empleyado nga seguradong maapektohan sa nakab-ot nga desisyon sa mga kongresista.

Gipeke ra

Gisumsoman karon ang tsismis nga matud pa duna’y nikatap nga hulagway sila si Marvin Agustin  ug Markki Stroem nga nagtupad og higda. Apan  nitataw ang fans ni Marvin nga klaro kaayo nga gi-edit ang maong hulagaway aron lang gyud madaot ang ilang idolo.

LDR

Nakasugakod ra si Yam Concepcion sa istado nila sa iyang uyab nga Miguel nga long distance relationship o LDR.  Nakabase sa Amerika ang iyang boyfriend ug kapin sa lima ka tuig na ang ilang relasyon.

Nakat-on na

Gipaneguro ni Marian Rivera nga makat-on gyud sa mga gimbuhaton sa balay ang anak niya nga si Zia. Sa iyang Instagram story, makita ang video  nga nanghugas  og  kubyertos si Zia nga nakasul-ob og pink apron.

Grabeng kaguol

Wala nadayon si Martin Nievera sa iyang online show sa miaging gabii tungod sa iyang kagoul nga wala na -renew ang  franchise sa ABS-CBN. “I really thought we would get a strict scolding and pay some fines. But I never thought for one second that almost everyone but 11 people in that room so easily ruined the lives of thousands. Just like that . No wonder they were rushing out of the room. I am sorry my kapamilya. My heart breaks and bleeds for you,” suma pa ni Martin.

Determinasyon lang

Giangkon ni Kylie Padilla nga tapulon siya usahay sa pag-workout.   Apan inig-sunod adlaw, malamdagan dayon ang iyang huna-huna nga kinahanglan gyud ang maong butang alang sa iyang balik-alindog program.

Utang kabubot-on

Panghinaot ni Maricar Reyes nga makalingkawas ang ABS-CBN sa gisagobang nga suliran niini. Suma pa ni Maricar nga dili gyud niya malimtan ang ABS-CBN gumikan kay wala gyud pasagdi ang iyang career sa dihang nakasugat siya og mga pagsulay kaniadto.   “ABS-CBN. Di ko makakalimutan ang tulong nila sa akin… especially at the lowest point of my public life… nandun sila LAHAT para tumulong,” suma pa sa IG post sa aktres.

Natuman ang pangandoy

Anam -anam na gyud nga nakab-ot ni Mimiyuuuh ang iyang mga damgo sa kinabuhi.  Nakapalit na siya og kaugalingong balay ug yuta. Suma pa ni Mimiyuuh nga nahaw-as na gyud sa kalisod ang iyang pamilya.

Transman ang uyab

 Usa ka transman ang uyab sa kanhi SexBomb girl nga si  Louise Bolton. Suma pa ni Louise nga proud siya niini ug gipatigbabaw gyud nila ang respeto sa usag-usa.“Doon talaga pumasok ‘yung love has no gender. Kapag nagmahal ka kasi hindi mo naman makikita ‘yan sa physical, age, and sa ano ba? Siguro sa ugali,”niya pa.

ML ang tirada

Ang pagduwa og Mobile Legends maoy usa sa mga butang nga lisod biyaan ni Rayver Cruz karong panahona. Wala ra hinoun masuko niini ang iyang uyab nga si Janine Guttierez.