PSN Showbiz

Learning and Winning Little by Little

March 9, 2020 | 12:00am

CEBU, Philippines — "Dili lang taas ug perfect skin ang pwede muapil sa Sinulog Idol, If you have a strong mind and good attitude then you will be an Idol forever".

Mao kini ang gipabuhagay sa 22 anyos nga produkto sa Sinulog Idol Season 11 nga naggikan pa sa Pinamungajan, Cebu nga si Angelito Alia o mas ilado na karon sa pangalan nga si Tolits Alia.

Giangkon ni Tolits nga 5'2 lang gyud ang iyang gitas-on ug naapiki gyud ang iyang pagtubo diin wala siya makaabot sa normal nga gitas-on sa mga lalaki nga anaa sa 5'6.

Dawat ni Tolits ang iyang gitas-on gumikan kay matud pa niya nga grasya gihapon kini sa Kahitas-an. Gani, mapasalamaton siya gumikan kay walay kuwang ang gihatag sa Ginoo ngadto kaniya ug sakto lang gyud nga matawo ug mabuhi ang usa ka Angelito Alia sa kalibutan.

"Dili man gyud ta hatagan tanan sa Ginoo kay bisan og dili ko perfect skin ug dili ko taas, super blessed ko kay daghan ko og nakamahuan nga magamit nako matag adlaw", pulong pa ni Tolits. Daghang kasikas sa kinabuhi si Tolits. Gani, usa siya ka trabahante sa usa ka ilado nga pharmaceutical company sa tibuok nasud ug nakadestino sa usa ka branch dinhi sa Sugbo. Gawas sa ilang trabaho, nag-alagad usab siya isip usa ka choir member sa Basilica Minore del Santo Niño.

Dugang pa, usa siya ka buotan nga igsuon sa iyang lima ka igsuon ug responsable nga anak sa iyang mga ginikanan.

Gisaysay ni Tolits nga naliwat siya sa iyang mga ginikanan nga daghan og talento sama sa kamao mangusina, mangita og panginabuhian ug labaw sa tanan, kamao sab gyud mokanta. "Walay nagtudlo nako og kanta pero akong mama kamao jud mukanta unya akong papa naa pud sa tono. Didto nako na discover nga kabaw diay ko mokanta sa pag tungtung nakog 4th year high school kay nag kantakanta kos classroom adto tapos nadunggan man sa maestra mao to gi encourage ko niya nga mu audition sa among campus mao to, nadala man ko so mao to didto na nag start akong career sa pagkanta, special thanks to Miss Nadine Quijano kay cia akong mentor adto na time", istorya pa ni Tolits. Gisugdan niya ang pagkanta-kanta sa edad nga 15 pinaagi sa pagpangalagad sa simbahan.

Ug karong tuiga, nisalmot siya sa ika-11 nga edisyon sa Sinulog Idol.

"Thankful and grateful kaayo ko nga nakasulod ko ani nga competition kay ang akong rason sa una kay gusto nako mapamatuod sa akong kaugalingon nga kaya nako mo-perform atubangan sa mga tawo aside sa pagserbisyo sa simbahan isip choir member", suma pa ni Tolits.

Dugang tumong ni Tolits ang mahimong ehemplo sa kadaghanan ilabi na sa kabatan-unan karon nga dili lang pagpasikat ang himuong tumong karong panahuna apan kinahanglan nga sama sa naandan nga kun adunay pagsuway nga masinati, dili angay mo-surrender ug ipadayon ang pag-kab-ot sa mga pangandoy sa kinabuhi.

Matawag ni Tolits nga usa ka dakong hagit ang Sinulog Idol. Matud pa niya nga nabag-ohan siya sa pamaagi aron pagsuta sa mamahimong mananaog.

Walay pagmahay nga nasulod siya sa maong hagit gumikan kay daghan siya og nga nakuha nga mga pagtulun-an nga magamit niya sa sunod nga hugna sa kinabuhi.

"Daghang lessons nga nakuha nako sa workshop pero kani ang dili nako makalimtan, ang workshop ni Sir Ryan Mark, nga dili angayan motubag or mo-share kung wala ka gipangutana ug dapat daw straight to the point. Ang workshop ni Coach Jay Unchuan nga dili mag- matter sa tingog pero ang feelings maoy importante Ug ang paggamit sa kaagi sa kinabuhi aron nga mahatagan og emosyon ang pagkanta ang akong nakat-onan sa workshop ni Mommy Apple", pagdetalye ni Tolits.

Wala giusikan ni Tolits ang iyang mga nakat-onan gumikan kay sa unang gabii sa kompetisyon, nahimo siya nga "Star of The Night" human niya giawit ang "Kailangan Kita".

Bisan pa man og gikwestyon kun hangtud kanus-a siya mahimo nga maluwas sa iyang kinasingkasing nga pagkanta apan padayon ang iyang kapalaran sa maong kompetisyon kun diin milanat lang sa lima ka gabii ang iyang pagpasundayag .

Wala niya hingpit gikaguol ang iyang pagkataktak sanglit igo na kini kaniya nga natuman niya ang iyang mga tumong sa pagsulod sa kompetisyon.

"Dako akong pasalamat nga naabot ko og Sinulog Idol . Karon, naa nakoy talent manager nga si Tita Gloria Villarojo. Kinsa man gud diay magdahum nga bisan humana ang competition, gi-gam gihapon mi para mapadayon pa namo og kab-ot among gusto maabot sa kinabuhi,” suma pa niya.

Pagtambag pa ni Tolits nga dili basehan ang postura aron makasalmot og dagko nga kompetisyon. Maayo nga pamatasan, kinasingkasing nga pagpakita sa talento ug pagsalig sa Ginoo ang makalahutay sa tinguha sa kinabuhi.

Q&A

BNH: Gawas sa imong Sinulog Idol story, unsa ang lowest point nga nahitabo sa imong kinabuhi nga dili nimo mahikalimtan?

TOLITS: Katong nagkaraoke ko tapos gipagngan ko og kalit sa usa sa akong family member kay naa siya'y tan-awon nga salida. Na-hurt ko adto kay giingnan ko nga bati ko og tingog. Pero pasalamat gihapon ko kay tungod ato ,sigi nakog practice bisan dili sa karaoke ,hangtud mao nani akong naabot karun.

BNH: Gawas nga mahimong usa ka singer, unsa ang imong mga damgo ug plano sa kinabuhi?

TOLITS: Gusto jud ko mag-artista, ayaw lang kog tawga og Father kay basin unyang madayon haha

BNH: Kinsa ang rason sa imong mga pagpaningkamot? Ug ngano?

TOLITS: Si mama kay siya akong inspirasyon. Siya ang hinungdan nganong nagpakalig-on ko ug mao ni akong promise niya nga maningkamot ko aron matuman tanan nako ug among pangandoy.

FASTFACTS

Name: Angelito S. Alia

Nickname: Tolits

Birthday: March 23, 1997

Address: Guimbawi-an, Punamungajan, Cebu

Height: 5'2

Weight: 55 kg.

Genre: Ballad/Pop

Favorite Colors: Black and White

Favorite Song: Kailangan Kita

Favorite Singer: Erik Santos

Celebrity Crush: Kathryn Bernardo