Sugar mihimakak sa isyu
CEBU, Philippines – Hugtanong gihimakak ni Sugar Mercado, ang taho nga naglambigit sa iyang pangalan ngadto sa Wowowin host nga si Willie Revillame.
Usa si Sugar sa mga dancer sa TV show ni Willie.
Suma pa niya nga giisip si Willie isip amahan sa tanang staff ug performers sa maong show busa nakugang siya sa maong isyu .
Matteo gitudlo isip ambassador sa NYC
Gawas sa iyang pagka- Philippine Army reservist, aduna pu’y dugang obligasyon ang Sugbuanon nga aktor nga si Matteo Guidicelli.
Gitudlo ang aktor dili pa lang dugay isip youth ambassador sa National Youth Commission (NYC).
Gihatagan og gibug-aton sa maong ahensya ang mga kontribusyon ni Matteo sa kabatan-onan.
Nasayran nga vocal kaayo si Matteo sa pagpadayag sa iyang pagmahal sa nasud ug duna pud siya’y dedikasyon sa iyang mga responsibilidad isip army reservist. —Sanden J. Anadia)
Bodyguard ni Sarah nidawat sa P200k nga settlement
Naareglo na ang personal bodyguard ni Sarah Geronimo nga si Jerry Tamara ug ang kampo sa aktor nga si Matteo Guidicelli.
Nag-atubang sila si Tamara ug ang dakong opisyal sa Viva Entertainment nga si Vic del Rosario sa miaging adlaw.
Nasayran nga ang Viva maoy naghupot sa mga career nila ni Matteo ug Sarah.
Sa YouTube channel sa Raffy Tulfo in Action ,makita ang nahisgotang panghitabo.
Wala hinoun sila si Matteo ug Sarah gumikan kay dili madala sa schedule niini.
Na-interview ni Tulfo si Vic , ug nipadayag kini nga nangayo si Tamara og P1.5M nga settlement isip danyos sa pagsukmag ni Matteo kaniya niadtong Pebrero 20 sa wedding reception nila ni Sarah.
Wala mosugot ang kampo sa Viva sa nahisgotang kantidad nga gidemanda ni Tamara. Una na nga gihimakak ni Matteo ang maong pasangil.
Apan sa labing ulahing kalamboan sa maong isyu, giingong nidawat na si Tamara og P200K isip settlement gikan sa Viva.
“Hindi Tayo Pwede”, sugdan karon
Mapasigarbohong gidalit sa Viva Films ang gihulagway niini nga “sexiest love triangle in Philippine cinema” karong panahona nga sila si Lovi Poe, Marco Gumabao, ug Tony Labrusca pinaagi sa pelikulang “Hindi Tayo Pwede”.
Sinuwat kini sa iconic storytellernga si Ricky Lee, ug ubos kini sa direksyon ni Joel Lamangan.
Sa trailer pa lang sa“ Hindi Tayo Pwede”, mabatyagan ang pag-todo sa mga bida sa ilang init nga mga eksena. Kahinumdoman nga nakalangkat og 1.6 million views ang teaser sa maong pelikula, 24 oras gikan sa pag-upload niini sa tanang social media platforms sa Viva. Mosikad na sa mga sinehan sugod karong adlawa ang “Hindi Tayo Pwede”.
Ang awit usab nga “Hindi Tayo Pwede” sa The Juans maoy official theme song sa pelikula. Aduna na kini 45 million streams sa nagkadaiyang platforms.
Mimiyuuuh dili na basta-basta
Dili na gyud mabangbang ang career sa komedyante ug internet sensation nga si Mimiyuuuh gumikan kay gikuha kini isip endorser sa Cebu Pacific.
Tsika pa ni Mimiyuuuh nga wala niya damha nga maabot sa punto nga mahimo siya nga travel ambassador sa usa ka kompanya sa eroplano.
Mahiligon ang komedyante sa paglarga ug usa sa iyang target nga adtoon mao ang Siargao ug ang hugyaw nga mga lugar sa Cebu.
Gibutyag sa Vice President for Marketing sa Cebu Pacific nga si Candice Iyog nga nalingaw ang kompanya kang Mimiyuuuh gumikan kay natural kaayo kini sa paghatag og kalingawan busa masaligon siya nga mahimo kining epektibo nga travel ambassador.
Gipaila-ila si Mimiyuuuh isip dugang endorser sa Cebu Pacific niadtong Lunes sa gabii didto sa usa ka hotel sa Makati City.
“LoiNie” makabaton og teleserye
Human sa ilang tandem sa pelikulang “James and Pat and Dave”, mag-uban napud sa usa ka teleserye ang mag-uyab nga sila si Loisa Andalio ug Ronnie Alonte .
Gianunsyo kini kagahapon sa ABS-CBN production unit nga RGE Drama.
Katapusang teleserye nila ni Loisa ug Ronnie mao ang The General’s Daughter sa miaging tuig kun diin gibidahan kini ni Angel Locsin.
Nagmaya niining higayona ang “LoiNie” sanglit masuwayan na gyud nila nga mahimong bida sa usa ka teleserye.
Ang RGE Drama maoy nagpaluyo sa hit series sa ABS-CBN nga “Pamilya Ko” ug “Nang Ngumiti Ang Langit”.
- Latest
