CPPO uyon marijuana i-legalisar

CEBU, Philippines — Uyon ang Cebu Provincial Police Office (CPPO) sa sugyot nga himoon nga legal ang paggamit sa marijuana sa pagtambal sa sakit sa patol.

Kini subay sa nigawas nga pagtuon sa World Health Organization (WHO) nga makatabang ang marijuana sa pagtambal sa sakit nga patol.

Nisugyot ang Dangerous Drugs Board (DDB) nga himoon nga legal kini isip tambal.

Apan matud pa ni CPPO Director, Police Colonel Rhoderick Mariano, nga gikinahanglan ang lawom nga pagtuon gikan sa mga eksperto ug sa gobiyerno.

Dugang pa ni Mariano nga gikinahanglan nga adunay gitugutan lang nga tawo nga mamahimo nga makatanom niini aron dili maabusaran.

Hinoon masaligon si Mariano nga adunay precautionary measures ang buhaton sa gobiyerno aron malikayan nga maabusohan ang paglegalisar sa marijuana sa nasud.

Samtang mokabat ngadto sa P272 milyones nga balor sa marijuana ang nalarot sulod sa 14 ka buwan ang CPPO.

Kini maoy gipresentar ni Mariano nga natala sa sunod-sunod nila nga operasyon sa Lungsod sa Balamban ug Dakbayan sa Toledo.

Dugang pa ni Mariano nga niabot ngadto 600,000 ka fully grown marijuana ang ilang nalarot sa 14 ka buwan gikan sa mga bukirang bahin sa Probinsiya sa Sugbo.

Samtang moabot na sab ngadto sa dul-an P38 milyones nga marijuana ang nalarot sa unang duha ka buwan sa tuig 2020.

Gibutyag ni Mariano nga sagad nga makuhaan nila nga adunay plantasyon sa marijuana mao ang Sitio Quo, Barangay Gaas ug Sunog sa Balamban ug bukirang bahin sa Dakbayan sa Toledo.

Samtang aduna say mga personalidad ang nailhan nga maoy nagtanom sa marijuana sa maong mga dapit ug gipasakaan na sab kini og kaso.

Sa pagkakaron padayon pa gihapon ang monitoring ug pagpangita sa mga marijuana plantation sa Sugbo.

Daku matud pa ang papel sa komunidad kinsa maoy mohatag og impormasyon kalabot sa nahimutangan sa marijuana plantation. GMR (BANATNEWS)