Fishing ban sa Visayan Sea gilibkas na

CEBU, Philippines — Gilibkas na sa Bureau of Fisheries and Aquatic Resources-7 ang fishing ban sa mga isdang sardinas (tamban), tuloy ug anduhaw (mackerels) sa Central Visayan Sea, niadtong adlaw nga Domingo.

Nobiyembre 15 sa miaging tuig gisugdan ang fishing ban sa maong mga isda ug natapos niadtong Pebrero 15. Ang tumong niini aron makasanay ang maong klase sa isda aron dili mahurot tungod sa sobrang pagpanagat sa mga commercial fishing boats. Ang Visayan Sea usa sa mga breeding ground sa maong mga isda.

Apan giangkon ni Dr. Allan Poquita, director sa BFAR-7 sa mga tigbalita nga bisan paman sa maong fishing ban, dili siya sigurado kun mosaka ang gidaghanon sa mga makuha sa mga mananagat karong gitugot na pagbalik ang pagkuha niini.

Sumala pang Poquita, bisan gipatuman ang fishing ban aduna silay mga nadakpang mga commercial fishing vessels sa maong lugar. Apan nasuta nga dili sila taga rehiyon 7.

Ang mga nadakpan gipasakaan na og kaso ug ang multa magdepende sa gidak-on sa ilang kalapasan.

Malaumon si Poquita nga ang mga LGUs motabang ug bantay diha sa ilang mga kabaybayonan ilabi na batok sa mga illegal commercial fishing vessels ug kadtong migamit og ilegal nga pamaagi sa pagkuha sa mga isda.

Tungod sa gituohang dili maayong epekto nga nahimo sa mga illegal commercial fishing vessels nga nangadakpan atol sa fishing ban, nagtinguha si Poquita nga irekomendar sa ilang ulohan nga buhatan nga lugwayan pa ang maong ban sa maong dapit.  IBM (BANATNEWS)