Retiradong huwes ug asawa, patay sa sunog

CEBU, Philippines — Duha ang nakalas ug usa ang padayon nga missing sa duha ka insidente sa sunog adlaw nga Lunes sa Dakbayan sa Mandaue

Sa sunog sa may Zamora Street, Barangay Centro sayo sa kaadlawon  nakalas ang magtiayong sila si retired Judge Gerardo Estopa Jr.,67, ug kapikas sa kinabuhi nga si Louella.

Wala pa matino kun hain ang 21-anyos nga adunay special needs nga apo sa mga Gestopa nga si Gerick.

Nadawat sa kabomberohan ang alarma alas 2:02 sa kaadlawon nga gituohan nagsugod sa panimalay sa usa ka Erlinda Ermac Lumapas.

Giisa hangtud 4th alarm  ang sunog ug hingpit kining nakontrolar alas-3:05 na sa kaadlawon.

Gawas sa namatay ug padayon missing, adunay tulo usab nga naangol nga mao sila si Besmark Lumapas, 38, nakaangkon og 1st degree burn sa iyang abaga, usa ka 8-anyos nga bata nga nasamad sa tuhod, ug ang usa ka Ruby Buhawi, 45, nga nasamdan sa duha ka tiil.

Ang ground commander sa maong sunog nga si Inspector Kyle Bryan Lauzon miingon nga dul-an P186 mil ang bana-bana nila sa danyos sa 15 ka balay nga hingpit nga naugdaw ug lima ang nakan-an sa kalayo.

Ang manghod sa huwes nga si Cesar Gestopa  nga nahinabi  sa mga tigbalita miingon nga ang iyang maguwang kauban  sa asawa nakagawas na unta apan namalik kay wala nila makita ang apong si Gerick apan na-trapped na hinuon ang magtiayon.

Matud niya makadaghan niyang gisangpit ang iyang igsuon ug bisan iyaha kining gisangpit nga pagawson ang duha apan wala na sila makagawas.

Hangtud ning pagbalita, wala pa masayod ang kabomberohan unsay sinugdanan sa pagulbo sa maong sunog. Apan wala pay 24- oras lain na usab nga sunog ang niulbo diha sa may Almer’s Compound sa Barangay Tabok sa mao gihapon nga dakbayan.

Gisubay pa sa kabomberohan ang pangalan sa balay diin nagsugod ang sunog  nga nilamoy sa pipila ka panimalay.  IBM (BANATNEWS)