PSN Showbiz

Subling Pakigtigi ni Marichar

February 17, 2020 | 12:00am

CEBU, Philippines — Walay lipod-lipod nga gipadayag sa 22- anyos nga si Marichar Labado nga ang gitakdang premyo maoy nag-unang rason sa pagsalmot niya sa Sinulog Idol karong tuiga.

Matud pa ni Marichar nga karon nga usa na siya ka inahan, tinguha gyud niya ang makakwarta aron nga aduna sab gyud siya’y ikabuhi sa iyang dos anyos nga anak nga si Nicko Blake Alexander Toring.

Dugang pa ni Marichar nga dili niya isalig sa iyang pares ang ilang kunsumo gumikan kay gipanaad niya nga mag-unong sila bisan pa man sa unsa ang ilang kahimtang ug dangatan.

Ang iyang pares nga si Nicodemus Toring mao ang nagtuklod niya nga mosalmot sa Sinulog Idol.

“Dili man gyud ko ganahan moapil ani kay makulbaan ko kay dugay rako niundang og apil og singing contest mga years na ang nilabay. Siya ang nagpush nako para mo join ani”, asoy pa ni Marichar.

Sa wala pa ang Sinulog Idol, ulahi siya nga nibirit sa entablado niadtong 2014 sa dihang misalmot siya sa reality singing competition nga “Rising Star” sa TV 5.

“Abi nako nga para akoa na to ang grand prize kay hapit na gyud, pero pag-announce ni Ogie Alcasid nga dili ko magpadayon hangtud sa finals , mao to nga time nga murag nahugno ang akong kalibutan. Grabe ko nga na-discourage atong higayona mao nga miundang nako sa pagkanta”, pagsaysay ni Marichar.

Aminado hinuon si Marichar nga dili gyud siya ingon ana kalig-on mokanta bisan og nagsugod pa siya sa pag-apil og mga singing contest sa edad nga singko anyos.

Dili na sab niya maihap kun pila ka mga amateur singing contests ang iyang nasalmutan ug matud pa niya nga dili kini basehan aron nga mamahimong bansay sa usa ka aspeto.

Dili man sab gyud ingon nga tubig-tubigan ang kahimtang ni Marichar sa iyang pamilya tungod kay daghan sila nga gibuhi sa ilang ginikanan. Walo sila managsuon.

“Akong pagkanta-kanta kay dako sab gyud siya og natabang kay nakahatag ko sa akong ginikanan . Nakatabang ko sa akong pamilya bisan og ginagmay lang. Nindot gyud ang naay talent gikan sa Ginoo mao nga gamiton ug dili abusaran”, siya miingon.

Bisan pa man sa ilang kalisod, wala usab magkulang ang iyang inahan sa pagiya aron makadiskubre og ubang estilo sa pagkanta.

“Katong mag jogging mi ni mama kada-kadlawon nga tangasonon kaayo nga karsada, then ika-20 ka balik para motaas daw akong tingog ug hangin.Ang di sab gyud nako makalimtan nga gitudlo sa akong mama mao ang dapat confident ug dili makulbaan”, si Marichar miingon.

Mao kini ang maingon nga mga bala ni Marichar sa dihang manulong siya og sangka sa tingog kaniadtong bata pa siya hangtud nga midalaga na.

Gani, mao kini ang iyang gibawon nga bala sa dihang mipaubos siya og audition sa Sinulog Idol .

Gawas sa premyo , tinguha usab niya nga makat-on sa dugang pagpalambo sa iyang pagkanta .

Nasayran nga katulo na siya ni-audtion sa Sinulog Idol sa wala pa siya hingpit nga nahimong finalist niini.

“As in wala ko magdahom nga madawat ko kay tungod sa kadaghan sa nag-audition,” padayag pa niya.

Sa dagan sa kompetisyon, tumang balanse sa oras ang gibuhat ni Marichar gumikan kay kinahanglan niya nga motambong sa iyang trabaho isip usa ka vocalist . Kinahanglan sab niya nga motambong sa mga workshop ug kinahanglan sab niya nga atimanon ang iyang anak ug ang iyang bana.

“Sa tinuod kay kapoy kay gamay lang ang oras sa pagpahuway kay daghan kaayo ang buhatunon pero dili gyud ko alkansi sa hago kay daghan kaayo ko og nakat-unan sa workshop ug daghan ko og nadiscover sa akong self. Nausab gyud ang akoang mga sayop sa pagkanta. Bisan og sakit ang mga comments sa mga judges kay dako kaayo to og impact para makamao ko ug maningkamot sa sunod nga contest nga akong apilan. Ug nakadiskubre ko nga makaya man diay nako nga magamit ang tibuok adlaw aron nga daghan og mabuhat sa usa ka adlaw kung magkugi lang gyud”, siya miingon.

Giangkon niya nga dako sab gyud ang kausaban human siya nisalmot sa Sinulog Idol.

“Before kay pataka lang ko og shagit, I mean dili man ko maayo nga belter jud, dili ko kamao modala sa ako voice when it comes sa pagbirit. Pero sa lesson nga akong nakat-onan sa Sinulog Idol sa bad comments sa judges about sa akong kinantahan, so mas nakat-on ko unsaon na karon. Sauna kay medyo wala jud koy emotion mokanta. Pero karun mas na ok na siya gamay kay na-apply na nako maski sa akong pag kanta sa banda. Ug kamao nako unsaon ang insakto nga pag-handle sa mic”, pagdetalye pa niya.

Tungod kay labing unang higayon niya nga makaangkon og sobra sa P10 mil nga ganti, dako sab gyud ang iyang napupo kun diin nakapalit siya og cellphone ug butang alang sa iyang gamay nga negosyo.

“Isip inahan nako, I know if makadaog ko dako kaayo matabang ang prize sa ako pamilya. Ug dili man gyud ko gradohan, but bisan og high school graduate rako, ganahan ko maningkamot ug magtigum kay ganahan ko naay akong kaugalingon nga negosyo. As in bata pako sige nako og imagine nga naa koy negosyo”, siya miingon.

Karon nga nahimo siya nga produkto sa Sinulog Idol, gawas sa premyo, ang dungog sab gyud ang iyang naangkon nga ipabuhagay niya sa kadaghanan.

“Sa tanan nga buhaton ug sa tanang nga moabot sa kinabuhi, kinahanglan lang nga magkugi gyud ug maghuwat sa sakto nga panahon gumikan kay tanang sakripisyo, magbunga ra gyud kini sa imong mga gitarget nga makuha pareho sa akoa nga premyo lang gyud ang akong goal pero mas labaw pa sa premyo ang akong nadawat karon mao na sobra ko ka blessed nga naabot ni tanan sa akoa”, pagtapos ni Marichar.

FASTFACTS

Name: Marichar Quijano Labado

Nickname: Chacha

Birthday: March 2,1997

Address: Tubod, Bulacao,Cebu City

School & Course: Candulawan National High School

Genre: Variety

Favorite Colors: Red,Pink,White

Favorite Song: Try It On My Own

Winning Piece: Listen

Favorite Singers: Beyonce,Celine Dion,Whitney Houston

Celebrity Crush: Michael Buble