Broadway night Jedu, Star of the Night; Lloyd, natagak!

CEBU, Philippines — Dili masukod ang kalipay nga gibati sa 21 anyos nga si Jeduthun “Jedu” Ligan human nga nahimong “Star of the Night” sa Broadway night atol sa ikaduhang gabii sa usa ka semana nga sangka sa tingog sa Sinulog Idol Season 11.

Gipabuhagay ni Jedu nga wala gyud niya damha nga mahimo siya nga kabahin sa Top 3 ug modominar sa maong gabii gumikan kay nakita niya nga aduna pa’y mas maayo sa iyang gipakita nga performance.

“Mixed emotions siya kay surely safe ko for tonight and daghan ang naka-appreciate sa akong performance”, si Jedu miingon. Giawit ni Jedu ang awit nga nalakip sa theater play sa Miss Saigon nga “Why God Why”. Matud pa niya nga giawit niya ang maong kanta gumikan kay  duol kaayo sa iyang kasingkasing ang maong awit.  Dunay parte nga  maka-relate siya ni  Chris , usa sa mga  karakter sa Miss Saigon kun diin duna siya’y mga pangutana sa iyang kinabuhi nga nagpangita  siya tubag. Bisan pa man og luwas na siya sa maong gabii apan dili gihapon siya mokompyansa gumikan kay aduna pay nahabilin nga mga gabii kun diin maingon nga mas krusyal pa gyud kun itandi sa nag-unang gabii.

“If star of the night ko ron and nanindutan na ang audience, imagine Coach Jay Unchuan na ang miingon nga ‘you’ve moved me’ , and I think next time kinahanglan pa nako nga mas ma-move pa nako siya u gang mga  nagtan-aw ug naminaw nako. I admit, I am pressured. Pressured at some point kay dapat mas molabaw pa imong performance on the next nights”, pahungaw pa ni Jedu.

Gawas ni Jedu, nagpabilin nga anaa sa Top 3 ang 18 anyos nga tinun-an sa University of Cebu (METC) nga si Thea Monterde ug ang 25 anyos nga gradwado gikan sa University of San Carlos nga si Chreystle Gealogo.

Kun nagpabilin man sa Top 3 sila si Chrystle ug Thea apan si Stephanie Dugaduga ug Shandee Hafeel mao ang nameligro sa  maong gabii gumikan kay silang duha ang anaa gihapon sa Bottom 3.

Ang ikatulo nga milangkob sa Bottom 3 mao ang 18 anyos nga tinun-an sa University of San Jose-Recoletos nga si Lloyd Abesia kinsa mao ang natangtang sa maong gabii.

“Sayang kaayo ang akong genre kay naa pa unta sa 3rd night, 4th night. Sayang kay wala ko mahatagan og chance nga ipakita akong full potential. Sa broadway kay mao gyud akong weakest gyud”, suma pa Lloyd.

Bisan pa man og dili na siya makalahutay sa mga mosunod nga gabii , mapasalamaton gihapon siya nga nahimo siya nga kabahin sa kapin usa ka dekada nga nagdagan nga kompetisyon.

“Pag-announce nga natangtang ko kay makaguol gyud pero pagkadungog nako sa comments sa mga judges kay nalipay ko kay nakakat-on ko. Naka-realize upd ko nga dili tanan naay chance nga makaapil sa Sinulog Idol”, si Lloyd miingon. Ang awit nga nakapatangtang ni Lloyd sa kompetisyon mao ang awit nga gipasikat sa Abba “The Winner Takes It All”. Matud pa ni Lloyd nga haum sa iyaha ang maong awit apan nawala siya sa dihang giawit na kini niya atubangan sa mga tawo sa anaa sa Fuente Osmeña.

Tuod man, magpabilin nga bililhon alang kang Lloyd nga mahimong kabahin sa kompetisyon ug anaa gihapon siya nga mosaksi hangtud nga mas magkainit pa ang kompetisyon.