Mosulbong nga tandem

CEBU, Philippines – Gipaniguro nila ni Julie Anne San Jose ug  Alden Richards nga ma-deliver nila og tarong ang ilang trabaho bisan pa man nga  taod-taod na sila nga wala nagtingog.

Kahinumdoman nga wala gyu’y klaro nga rason  kun nganong nag-unfollow sila  sa usa’g-usa sa Twitter sa dihang nagkauban sila kaniadto sa Party Pilipinas.

Kahinumdoman nga sweet kaayo sila sa una apan naputol lang kini sa dihang nilenggua si Alden nga wala niya panguyabi si Julie Anne ug friends ra sila.

Sa pagka-karon,  gikatahong gi-build up  ang tandem nila ni Alden ug Julie Anne sa bag-ong show sa GMA nga All-Out Sundays (AOS),.

Nagkauban ang duha sa opening number sa pilot episode sa maong show niadtong Enero 5. 

Drama lang?

Nag-uban sila si  Nadine Lustre ug  James Reid sa  pag-hike  sa  Mt.  Ulap didto sa  Benguet kauban ang ilang mga higala.

Una na nga niulbo ang balita pagbag-ong tuig nga nagbuwag na sila sila James ug Nadine.

Nagsagol-sagol ang reaksyon sa netizens, dunay uban ang nilenggua nga  hagbay ra nga gikasabotan ang pagkatkat nila  sa bukid  sa dihang wala pa sila nagbuwag hinungdan nga ila ra kining gidayon.

Makita usab sa hulagway nga igo ra sila nagtupad ug wala gyud nag-akbayay.

Duna pu’y ubang netizens ang nagkanayon  nga trying hard ra kaayo ang JaDine gumikan kay ipalabas ra nila nga wala gyud sila nagbuwag.  

Catriona mulugwa sa Bb. Cebu

Sa labing unang higayon, mosaksi sa Bb. Cebu pageant si 2018 Miss Universe Catriona Gray.

Ang Bb. Cebu mao sab ang unang pageant nga lugwaan ni Catriona human niya gipasa ang iyang korona ngadto kang Miss South Africa sa nilabay nga bulan.

Ang Bb. Cebu mahitabo karong Lunes sa gabii puhon, January 13,  diha sa Grand Pacific Ballroom sa Waterfront Cebu City Hotel. Lima ka mga titulo ang ilogan sa 54 ka mga kandidata gikan sa nagkadaiyang lungsod ug dakbayan sa lalawigan sa Sugbo.

Ang nahisgutang mga titulo mao ang Binibining Cebu, Binibining Cebu Tourism, Binibining Cebu Charity, Binibining Cebu Heritage ug Binibining Cebu Ecology.

Samtang kanunay na nga maaninaw si Catriona sa publiko human siya gipaila isip labing bag-ong co-host sa ABS-CBN’s “It’s Showtime” niadtong Lunes.

Bag-ohay lang usab siya nga nipirma og kontrata sa ABS-CBN Publishing alang sa iyang imantala nga libro.

Palagot sa kontra

Gipanalipdan  ni  Maine Mendoza ang iyang  boyfriend nga si Arjo Atayde batok sa  bashers.

Adunay 5.6 million Twitter followers si Maine ug gisuklan  ni Maine  ang basher nga nagpauso sa hashtag nga #NoToArjoTheUser.

Kalmado matud pa ang gigamit niya nga pulong apan makapalagot kini sa  kontra.

: “Wow, some ‘fans’ made #NoToArjoTheUser trend today. Congrats! But I say #YesToArjo,”

tubag pa ni Maine.  

KC nag-sorry

Nangayo og sorry si  KC Concepcion sa iyang inahan nga si  Sharon Cuneta . Nasayran nga wala makatambong si KC sa birthday celebration sa Megastar sa ASAP. Matud pa ni KC nga personal ang iyang rason sa wala pagtambong niini.

Nakadaog gyud

Napili nga 2nd runner-up  ang  Kapuso singer nga si Hannah Precillas sa  Dangbut Academy (D’Academy) Asia 5 sa  Indonesia. Niabot ngadto sa 20 ka  Bahasa songs ang nakat-onan ni Hannah tungod sa maong show.  Si  Hannah ang breadwinner sa iyang pamilya ilabi na karon nga nagkasakit ang iyang inahan.

Nagkadoul na

Aduna na’y petsa ang kasal nila ni  Richard Gutierrez ug  Sarah Lahbati. Mahitabo kini karong  March 14. Wala pa gidetalye sa duha ang mga malalakip sa ilang entourage.

Nagbantay sa mga anak

Maglisod si Andi Eigenmann sa pagdawat og daghang proyekto gumikan  kay siya mismo ang nagbantay sa duha niya ka mga anak.    Una na nga gipadayag ni Andi nga kontento na siya sa ordinaryo niya nga kinabuhi.

Kever sa bashers

Gi-bash  og maayo si Gabbi Garcia sa dihang gipublikar nila ni  Khalil Ramos ang ilang relasyon. Suma pa ni Gabbi nga wala kini katumpag kaniya  ug dili ra siya manumbaling sa mga tawong nisaway sa ilang relasyon.

Friends ra uy

Tsika pa sa   Prima Donnas star nga si  Will Ashley nga dili tinoud ang  taho nga na-develop na siya  kang Jillian Ward.  Nagkasoud lang gyud sila tungod sa  Prima Donnas.

Naglawig ang career

Dili na gyud mabangbang ang career ni  Kyle Echarri  gumikan kay gawas sa pag-arte,  wala usab niya mabiyai ang  pagkanta.   Suma pa ni Kyle nga first love niya ang musika busa dili gyud siya kabiya niini bisan paman nga busy siya karon sa teleseryeng Kadenang Ginto.

Naglikay sa gubot

Gitataw ni   Rayver Cruz nga dili  siya mag-apil apil  sa isyu kalabot nila ni  Gerald Anderson ug Julia Barretto.   Matud pa niya nga dili na angay buhion ang maong isyu.

Gastohan ni Arci

Magdala og fan  si  Arci Muñoz sa  higayon nga motikang siya og balik sa  South Korea aron motan-aw sa concert sa BTS. Siya matud pa ang mogasto niini.

Ikaw na Bea!

Sa pagsulod sa 2020,  nilugwa dayon si   Bea Alonzo  sa 2020  isip cover girl sa duha ka mga magazine.    Nagbandera ang dagwat ni Bea  sa Esquire Philippines ug  Preview magazine.