Mabdos si Max

CEBU, Philippines — Malipayong gipahibalo  sa magtiayong  Max Collins ug  Pancho Magno nga aduna na sila’y umaabot nga anak.

Gipahibalo ni Max niadtong Pasko nga nagsabak siya.

“The more the merrier!! Merry Christmas from our growing family to yours,” suma pa sa iyang IG post.

Samtang sa hulagway ni Pancho, gipakita niini ang iyang sonogram.

Gikasal sila si Max ug Pancho niadtong December 2017. 

Aga todo pasalamat sa fans

Todo pasalamat  si Aga Muhlach sa iyang  fans gumikan sa init nga pagsuporta niini sa pelikula niya sa Metro Manila Films Festival 2019 nga  “Miracle in Cell No. 7” nga matud pa gidumogan og maayo  sa unang adlaw nga pagpasalida niini niadtong Pasko.

“I am truly humbled. Maraming salamat talaga sa inyong lahat!!!” suma pa sa iyang IG post nga nagpakita sa mga hulagway kun diin gilinyahan og maayo ang iyang pelikula.

Ang usa mga bida niini nga si  Xia Vigor, nisuroy usab sa mga sinehan . Nalakip usab sa maong pelikula sila si  Joel Torre, JC Santos, Mon Confiado, Jojit Lorenzo, Soliman Cruz, Joel Torre, Bela Padilla, ug  Tirso Cruz III.  

Sakyanan ni Barbie giransak

Nakaplagan ni Barbie Forteza  ang iyang sakyanan nga giransak  didto sa Kamuning Road sa  Quezon City sa miaging gabii.

Ang  boyfriend   niya nga si Jak Roberto  maoy nibalita niini  pinaagi sa iyang latest vlog entry.

Suma pa ni Barbie  nga guba ang CCTVs  sa  maong areas busa naglisod gyud sila og pangita sa mga sakop sa  “basag-kotse gang”.

Nakuha sa mga suspek  ang bag  sa iyang inahan.

Maayo na lang gani nga walay naangol sa maong insidente  ug dili kaayo importante ang sulod sa bag sa iyang inahan nga gilangkoban lang og power bank, lipstick, wet wipes ug  hair tie. 

Catriona mihatag og katin-awan

Hugtanong gihimakak ni Miss Universe 2018 Catriona Gray nga  nidiskarte kaniya sila si  Sam Milby ug Alden Richards.

Suma pa sa beauty queen nga wala pa gyud  nya nahimamat  ang Kapuso star nga si Alden.

Samtang kauban ra usab niya sa management si  Sam  hinungdan nga iyaha kining nahigala. 

Jerald pasok sa Probinsyano

Milugwa na sa ABS-CBN ang kanhi Kapuso star nga si   Jerald Napoles pinaagi sa  teleserye sa iyang soud nga higala nga si  Coco Martin nga Ang Probinsyano. Kahinumdoman nga gitanyagan na ni Coco si Jerald mga pasudlon sa maong teleserye niadtong 2015 apan  nibalibad ang komedyanteng aktor niini  gumikan kay nakatando na kini sa usa ka show sa GMA niadtong higayona.

Lakop sa mga bag-ong  nisulod   sa  Probinsyano mao sila si Ara Mina, Rhen Escaño, ug  Tirso Cruz III.

Uyab ni  Jerald ang komedyanteng Kapamilya star nga si  Kim Molina.