Man-Made Forest sa Minglanilla

CEBU, Philippines – Malipayong adlaw nga Biyernes kaninyong tanan. Sa walay paglangay-langay, manglaag na sab ta. Niining tungora, sud-ungon ta ang labing una ug labing karaan nga man- made forest sa tibuok nasud. Kuyugi ko ninyu sa pag-explore sa Osmeña Reforestation Project Man-Made Forest sa dakbayan sa Minglanilla!

Mo-break una ta sa pagpasundayag kaninyu sa mga maputing kabaybayonan sa Sugbo tungod kay sa pagka-karon, isuroy ta mo sa kalasangan.  Ang Osmeña Reforestation Project maoy puluy-anan sa mga nagkadaiyang endemic ug indigenous trees sama sa narra,almaciga, tanguile, bagtikan ug banaba.

Anaa pud dinhi nakaturok ang exotic trees sama sa mahogany, lumbang teak ug norfolk island pine.

Ang maong dagkong mga punuan sa kahoy, haom kaayu arun mahimong picture-perfect ang backdrop sa inyung mga hulagway ig- abot sa Facebook ug  Instagram.

Mga nagkadaiyang langgam sab ang musud-ong kanimo  sa panahong mobisita ka dinhi lakip sab ang langub ug kasapaan.

Matud  pa sa Tourism Officer dinhi nga sa Christian "Miss K" Alicaya, naglaraw ang mayor sa Minglanilla nga si Hon. Lani Peña sa pag- conserve, preserve ug pag-develop sa maong lugar isip usa ka eco-tourism attraction sa habagatang bahin sa Sugbo.

Ang maong laraw suportado sa DENR ug Cebu Province pinaagi sa Provincial Tourism Office.

Ang maong man-made forest nahimutang sa Campo 7 sa maong dakbayan.  Kini gidumala sa Coastal Resources and Ecotourism, Research, Development, and Extension Center o kun CRERDEC sa DENR.

Ang pagpanindot ug pagpanglimpyo sa maong lugar gidumala sa taga Camp 7 Non-Timber Multi Purpose Cooperative (CNTPMPC).

Good news alang sa tanan tungod kay sa pagkakaron, wala pa’y entrance fee  alang sa mga bisita sa maong dapit.

Atong nasayran nga nahimugso kining lugara  tungod sa pagpaningkamot sa labing unang Speaker of the Philippine House of Representatives, Sergio Osmena Sr. ug mao kini ang hinungdan kun  nganung ginganlan kini og Osmena Reforestation Project.

Bukas kini sugod alas otso sa buntag hangtud alas kwatro sa hapon.  Anaa na kini sa Minglanilla sukad pa niadtung tuig 1916.

Sa akong pag sud-ung dinhi, na-relax gyud ko sa  hoyohoy sa hangin . Matud pa, "color green is vitamins to our eyes" ug tuod man, na- refresh gyud ko.

Sa mga estudyante ug mga magtudtudlo, nindot sab dinhi pagabuhatun ang Nature Appreciation Tour ug Upland Reforestation Educational Walk dungan sa pakig-alayon sa Tourism Office sa Minglanilla.

Gikan sa dakbayan sa Sugbo, mosakay lang ka og minibus paingun sa Tabunok  ug mo plete ra ka og P20.00 pesos ug kung anaa naka sa maong lugar, mosakay na sab ka og habal-habal paingun sa Campo 7 kung diin nahimutang ang maong man-made forest.

Daghang salamat sa inyung pagbasa, hangtud sunod semana na usab!