December na, pangandam na!

CEBU, Philippines — Nitungtong  na kita sa buwan sa Disyembre, medyo nagpanikad na gyud ang kasagaran kanato  sa nagkaduol na usab nga Pasko. Ato gyud nga seguraduon nga kita magmalipayon sa pagsugat sa maong okasyon.

Ang uban kanato dako kaayo og smile kay nakadawat na sa ilang christmas bonus  ug naa pa  gyu’y 13th month pay, wow, tiba-tiba nga kuwarta.

Kun aduna mo’y igong natigom nga kuwarta karong panahona, ania ang Christmas tips alang kaninyo:

Pampahupas sa utang

Sa mga  tawo nga nagtangag og mga utang diha, labing maayo nga hinayhinaya na kini og bayad.

Kahibalo ko nga duna gyuy mga  panahon nga makautang kita ilabi na sa panahon nga nanginahanglan kita tungod sa kalit –kalit nga sitwasyon. Kun mabuhat ni nimo ang pagbayad sa imong utang, mosamot kasadya ang imong Pasko gumikan kay wala ka naghuna-huna og daghang balayrunon. Bahalag gamay nalang ang mahibilin sa imong kuwarta, ang labing importante nga wala na’y sige og paningil kanimo.

Mga kinahanglanon

Importante   kaayo ang gitawag og emergency money.  Sa panahon sa pasko, dali ra kaayo kita madala sa mga sale sa tindahan. Okay raman mopalit sa mga butang nga kinahanglanon gyud.  Pag-limit sa imong gasto ug  kanunay ka mohipos og kuwarta ug dili kini gastohon sa dili kaayo importante nga mga butang. Sa panahon nga dunay emerhensya, dili ka magkapuliki og pangita og kuwarta.

Himuon og puhonan

Posibleng dunay gamay nga sobra sa nadawat  nimo nga grasya.  Suwayi  og  invest, bisan kanang  ginagmay nga negosyo.  Mamaligya ba kaha og mga butang nga pang- gift ideas. Gamita kini  kun tan-aw nimo safe ug mapahimuslan ang imong kwarta. Pahimangno lang, dili  magpataka og invest aron  dili mahimong bato ang inyong kuwarta.

Kalit-kalit Paghatag og regalo

Tradisyon na gyud sa mga Pinoy ang paghatag og regalo.  Pero huna-hunaa ha, dili kini compulsory.  Hinuon pud, lami kaayo sa pamati nga makatunol kita og gasa sa atong mga minahal sa kinabuhi.  Pahimangno lang,  dili kinahanglan nga mahalon, okay raman barato basta kinasing-kasing lang ug seguradong mapahimuslan kini sa tawo  nga imong hatagan. Labing nindot, mas maayo nga mohatag ka sa tawo nga labing tabanganan. Gumikan kay ang pagtabang sa mga tawo nga nagkalisod maoy usa sa tinud-anay nga kahulogan sa Pasko. Kun apike gyud sa budget, dili maguol, gumikan kay ang the best nga regalo mao ang pag-ampo sa Ginoo nga unta  ang inyong mga minahal sa kinabuhi kanunay makabaton og maayong panglawas ug maghatag og daghang grasya.