Positibo sa drugas sa CH tabangan sa rehab
CEBU, Philippines — Andam tabangan ni Cebu City Mayor Edgardo Labella ang 37 ka kawani sa City Hall nga nagpositibo sa paggamit og ilegal nga drugas kung mangayo sila og rehabilitation assistance.
Ang 37 mao ang lima gikan sa Market Operations Division; 10 sa Prevention, Restoration, Order, Beautification and Enforcement Team; siyam gikan sa Department of Engineering and Public Works; upat gikan sa Department of Public Services; tulo gikan sa Department of Manpower, Development and Placement; duha gikan sa Department of General Services; duha gikan sa Parks and Playground Committee; ug ang matag usa gikan sa City Registrar's Office ug Operation Second Chance.
Giingong lima sa 37 ka trabahante ang niundang na sa ilang trabaho.
Matud ni Labella nga ang mga regular nga empleyado nga positibo sa paggamit og ilegal nga drugas ang hatagan og due process samtang ang mga kaswal nga empleyado dili na ma-renew.
Gidayeg ni Labella ang City Office for Substance Abuse Prevention sa paghimo sa ilang trabaho.
Si Labella niadtong konsehal pa siya sa tuig 2000 niduso og ordinansa nga nagmando alang sa mandatory drug test sa mga mo-apply og trabaho sa City Hall. Apil sa maong ordinansa ang random drug testing alang sa mga empleyado.
Samtang gipahibawo sa City Legal Office nga pito ka empleyado sa Cebu City Hall nga nagpositibo sa ginadiling drugas ang nitubag na sa show cause order subay sa nagpadayon nga imbestigasyon.
Matud ni Atty. Rey Gealon nga gipadad-an nila og show cause order ang mga hingtungdan aron hatagan og higayon sa pagtubag nganong dili sila angay taktakon sa trabaho. Dugang ni Gealon nga kinahanglang karong semanaha makompleto na ang tanan sa paghatag sa tubag aron makapakanaug na sila og rekomendasyon. GMR (BANATNEWS)
- Latest