PRO-7 nanghatag og 38 ka motorsiklo

CEBU, Philippines — Gipangapod-apod na sa Police Regional Office 7 ang 38 ka bag-ong motorsiklo ngadto sa mga Provincial Police Offices sa Central Visayas.

Matud ni PRO-7 Director, Police Brigadier General Valeriano De Leon, nga ang mga motorsiklo gamiton kini sa Enhancement Police Visibility ug Quick Response Team sa kapolisan aron paspas ang pagtubag sa alarma.

Ang mga motor gamiton usab kini sa pipila ka traffic personnel nga mga polis diha sa kadalanan.

Nakadawat og 18 ka bag-ong motorsiklo ang Cebu PPO, siyam sa Bohol PPO, walo sa Negros Oriental PPO ug tulo sa Siquijor PPO.

Samtang si CPPO Director, Police Colonel Rhoderick Mariano, nagkanayon nga ang mga motorsiklo nga ilang nadawat ipangapod-apod kini sa lain-laing mga police stations nga nangihanglan niini. Ang pagpangapod-apod sa mga motorsiklo subay kini sa Quick Response Program sa kapolisan. GMR (BANATNEWS)