Paukyab ni Bea
CEBU, Philippines – Nag-trending niadtong Miyerkules sa gabii ang gi-post nga hulagway ni Bea Alonzo sa social media kun diin nagpakita kini sa reunion project nila ni John Lloyd Cruz.
Nagkauban kaniadto ang duha sa ilang sikat kaayo nga pelikula nga “One More Chance.”
Nagmalampuson usab ang ilang mga pelikula kaniadto nga “One More Chance” (2007 ) ug “A Second Chance”( 2015).
“Matagal nang hindi nagkita at nagkasama. Puwede pa rin kayang magkaroon ng last chance?”,” suma pa sa iyang IG post.
Sa maong hulagway, duna pu’y nakasuwat nga “A Last Chance?”
Apan base sa mga hashtag ni Bea, giingong ang maong hulagway adunay kalabotan sa giendorso nila nga brand sa shawarma.
Kim nakadawat og Gold Play Button Award
Nakalangkat na usab og laing dungog si Kim Chiu sa YouTube human siya nakabaton og 1 million subscribers sa iyang channel.
Nakadawat ang aktres og Gold Play Button Award busa todo ang iyang pagmaya.
Giangkon ni Kim nga nagduha-duha gyud siya nga mag-vlog gumikan sa kahadlok nga hukman dayon siya sa ubang tawo.
Human nakakita sa video sa ubang vloggers, nainteresado dayon siya nga mogama na og kaugalingon niya nga YouTube channel.
“This year I started again after watching several YouTuber’s videos. I realized that you just have to be yourself, have fun and most especially be friends with your camera! I want to inspire people with my videos, share the memories I had and bring you to places I have been,” saysay pa ni Kim pinaagi sa iyang IG post.
Nanaghan ang followers
Nagmaya og maayo ang kontrobersyal nga aktres nga si Julia Barretto gumikan kay niabot na og kapin sa 8 million ang iyang followers sa Instagram.
“A grateful heart is a happy heart. We are 8M strong. Thank you to all my friends here on IG,” suma pa sa iyang IG post.
Bisan nga na-bash si Julia kaniadto, wala gyud manumbaling ang aktres niini ug wala gyud niya putla ang pag-enjoy sa social media.
Kahinumdoman nga gipasanginlan si Julia nga matud pa maoy rason sa breakup nila ni Gerald Anderson ug Bea Alonzo.
Zanjoe target mahimong producer
Bukas si Zanjoe Marudo sa posibilidad nga mahimong producer puhon. Napanglantawan sa aktor nga lingaw pud ang trabaho likod sa kamera.
Nalakip ang aktor sa digital series nga “My Single Lady” kun diin kauban niya si Jodi Sta. Maria nga usa pud sa mga producer sa maong proyekto.
Maja gisurpresa sa bf
Nakadawat og birthday surprise si Maja Salvador gikan sa iyang boyfriend nga si Rambo Nuñez kun diin gitapok niini ang ilang mga soud nga higala sa miaging gabii.
“Thank you dahil alam mo lagi kung paano ako pasayahin. Mahal kita,”mensahe pa ni Maja ngadto sa iyang boyfriend.
Una na nga gipadayag ni Maja nga espesyal kaayo ang ilang relasyon gumikan kay nagbalik gyud sila niini human sa siyam ka tuig sukad sila nagkabulag.
Rocco emosyonal atubangan sa OFWs
Wala kapugong si Rocco Nacino sa pagtulo sa iyang mga luha sa dihang nahimamat niya ang mga Pinoy didto sa Middle East nga naghinam-hinam na nga makauli sa Pilipinas.
“Pagpasok na pagpasok palang, iba ‘yung aura, so unang salita ko palang may umiyak na sa harapan ko. Naiyak din ako, dahil umiyak ako, umiyak lahat,” suma pa ni Rocco sa interview niya sa GMA News’.
Usa si Rocco sa mga artista nga nitikang sa maong dapit alang pagdalit og kalingawan sa mga Pinoy.
Nagduwa siya og basketball kauban ang ubang Kapuso stars nga sila si Mikael Daez, Mark Herras, Derrick Monasterio, Christopher Martin,Andre Paras ug Mike Tan .
Nanamilit na sa usa’g-usa
Tsika pa ni Angel Locsin nga seguradong mingawon gyud siya sa iyang mga kaubanan sa nanghinapos nga teleserye sa ABS-CBN nga “The General’s Daughter” .
Nag-post si Angel sa Instagram og wacky photo sa iyang co-stars sa maong teleserye nga sila si Tirso Cruz III, JC de Vera Janice de Belen, Eula Valdez, ug Ryza Cenon .
“Last taping day for ‘The General’s Daughter.’ Walang iiyak,” caption pa ni Angel.
Samtang si Ryza sa iyang bahin, nipadayag kini nga mingawon gyud siya sa bonding nila sa mga bitoon sa maong teleserye.
“‘To ang mami-miss ko, ‘yung bonding sa likod ng camera! Hindi pa dito nagtatapos ang lahat, magkikita pa tayo!” matud pa ni Ryza.
Echo napakyas og lugwa sa Busan International FilmFest
Wala makatikang si Jericho Rosales sa 24th Busan International Film Festival didto sa South Korea gumikan sa mga kakulian nga dili kapugngan. Nasayran nga dunay world premiere ang short film niya nga “Basurero” sa maong film festival.
Matud pa sa aktor nga nakanselar ang iyang flight padulong sa South Korea gumikan sa naglain nga panahon.
“But that won’t stop me from getting excited for everyone at the Busan International Film Festival from watching good movies and moving shorts like our film in competition, ‘Basurero.’ Cheers to one of the best female directors I’ve worked with! Have fun and I’ll see you (and our film) in Manila!” suma pa sa IG post ni Echo.
- Latest