Karong disyembre ang kasal

CEBU, Philippines —  Gikatakda na nga kaslon karong umaabot nga Disyembre si Jolo Revilla ngadto sa iyang fiance nga si Angelica Alita nga usa ka beauty queen. Human nga mipadayag si Jolo sa maong balita, mitumaw nga sa California pagahimoon ang seremonya sa ilang kasal.

Gikanselar ang mga concert

Nakanselar ang concert ni KZ Tandingan nga Supreme World Tour 2019 sa U.S. Tulo ka show niini ang wala madayon tungod kay wala mituman ang concert promoter niini sa obligasyon kabahin sa gihatag nga protocol ug show requirements.

Usa ka damgo ni Elaine

Aduna pay usa ka damgo ang Tawag ng Tanghalan Season 3 Grand Champion nga si Elaine Duran. “Sana po as an artist ay magkaroon ako ng time na makapag-produce o makapag-release ng songs ko, kasi nagko-compose rin po ako”, suma pa ni Elaine.

Kaslon na gyud

Mahitabo na gyud ang kasal nga hagbay ra nga gipangandoy sa kanhi sexy star nga si Valerie Concepcion. Karong umaabot nga Disyembre 28, mopaso na paingon sa altar si Valerie kauban ang iyang pamanhunon nga si Francis Sunga. Kahinumduman nga tuig 2018 mibutyag si Valeria kabahin sa ilang relasyon.

Simple lang

Usa ka intimate celebration lang ang gipahigayon ni Angelina Cruz sa iyang ika-18 nga adlaw’ng natawhan. Matud pa niya nga ang iyang pamilya ug suod nga higala ang iyang giimbitar. Dugang pa niya nga giimbitar sab niya ang iyang amahan nga si Cesar Montano.

Mobalik unta sa kanhi trabaho

Wala magdahom ang Kapuso star nga si Jo Berry nga madungagan pa ang iyang madawat nga proyekto human mibida sa serye nga ‘Onanay’ niadtong miaging tuig. Matud pa ni Jo nga kun wala pa siya nahatagan og proyekto, mobalik siya sa iyang trababo isip usa ka office girl.

Proud sa amahan

Sobra gyud ka proud si Camille Prats sa iyang amahan gumikan kay nahinayon ug malampuson gyud ang gi-organisa nga Hueniverse Music Festival niadtong Sabado, September 28 sa Filinvest City Events Grounds. Matud pa ni Camille nga gitabangan sab nila ang ilang amahan aron nga mas dali ang trabaho niini sa gipangandoy nga kalihukan. Gitawag ni Camille ang ilang hugpong og Dsprats Group of Companies.

Dili na tugtan

Dili na sugtan si Aiko Melendez nga makabaton og mga kissing scene sa mga proyekto nga lakipan niini. Matud pa ni Aiko nga dili uyon ang iyang boyfriend nga si Zambales Vice Governor Jay Khonghun ug ang iyang mga anak nga sila si Andrei ug Marthena.

Bida sa araw-araw

Bida gyud sila si Gabbi Garcia ug Khalil Ramos sa bag-ong single nga ‘Araw-Araw’ nga gimugna sa banda nga ‘Ben&Ben’. Ang music video niini gipagawas na sa internet ug wala pa lang maabti og usa ka adlaw sukad kini giupload, miabot na kini sa kapin 200,000 ang views.