Make his own name

CEBU, Philippines — Mireak ang South Korean heartthrob Park Seo Joon sa pagtawag niya og "Ryan Gosling  of Asia" tungod sa mga malamposon niyang mga proyekto. Niya pa, usa siya ka fan sa maong Hollywood actor apan mas gusto niyang mukulit og kaugalingong pangalan sa industriya."I would like to make myself known as the person that I am,"niya pa.

Hermes placemats

Mipaukyab na sab sa netizens ang Kapuso actress Heart Evangelista pinaagi sa  bag-ong vlog entry niini diin gipakita niya ang mahalon niyang mga gamit sa kusina ug usa na niini ang  Hermes placemats sulod sa iyang  ‘china room’. Dili lang kini ang unang higayon nga gikagubtan sa social media ang mga vlogs ni Heart human nipakita sa mga mahalon niyang mga gamit.

Presensya ug pagmahal

Giangkon ni Angelina Cruz nga giimbitar niya iyang amahan nga si Cesar Montano para motambong sa iyang  18th birthday kagahapon. Wala matod pa siya'y gusto nga materyal nga regalo kun dili ang presensya ug pagmahal lang sa iyang mga ginikanan. Kahinumduman nga buwag na iyang inahan nga si Sunshine Cruz ug amahan nga si Cesar.

Overwhelmed sa success

Hilabihang kalipay ang gibati sa Kapamilya actress Kim Molina sa box-office success sa gibidahan niyang pelikula nga Jowable. “Sobrang saya na sa daldal kong ito natatahimik na lang po ako. Sobrang thankful ko po kay God sa lahat ng blessings na binibigay niya,"sigon pa ni Kim.

Pasalamat ni Jake

Very proud ug thankful matod pa ang aktor nga si  Jake Cuenca ngadto sa iyang  "Los Bastardos" family human sa kapin usa ka tuig na nilang panag-uban sa maong serye.  Gipaambit sa hunk actor sa Instagram ang taas nga pasalamat niini ngadto sa tanang casts ug crew sa maong afternoon series sa ABS-CBN. Natapos na ang maong serye niadtong Biyernes ug hulipan na kini sa seryeng Sandugo sugod karong Lunes karon hapon.

Kiwawan

Gipaambit ni Kapamilya hunk actor Tony Labrusca nga kiwawan matod pa siya sa pagtawag niya og "sexy actor". “For me, that’s not something that I was ever really comfortable with. It’s not that I don’t like it. It’s more of I’m a little overwhelmed,"sigon pa sa guwapong aktor.

Target ang balay

Gibutyag sa young actress nga si Heaven Peralejo nga pangandoy niya nga makapatukod og balay para sa iyang pamilya. Sa pagka karon, nagbayad pa siya sa iyang sakyanan ug kun maimpas  na kini,  balay na sab ang sunod niyang ipatukod gamit ang iyang sweldo sa showbiz.

Update ni Julia

Mihatag og update ang King of Talk Boy Abunda kung kumusta na ang Kapamilya actress nga si Julia Montes. Sigon pa sa pakig-estorya ni Boy ug sa suod nga higala ni Julia nga si Mylene Dizon, giasoy niini nga mobalik na dinhi sa Pilipinas ang aktres  human nibisita sa iyang amahan didto sa Germany. Giasoy kini ni Boy atol sa iyang programa nga Tonight with Boy Abunda sa ABS-CBN.

Trending worldwide

Gipagawas na ang full trailer sa pelikulang  'Isa Pa With Feelings' nga gibidahan nilang  Maine Mendoza ug Carlo Aquino. Mao kini ang labing una nga panagpares nilang Maine ug Carlo sa big screen nga gikatakdang ipasalida karong Oktobre 16. Tungod niini, nahimong trending sa twitter  worldwide ang hashtag nga #IsaPaWithFeelingsTrailer.

Gibandera ang lawas

Gikagubtan sa social media ang mga sexy photos ni Miss Universe 2015 Pia Wurtzbach atol sa bakasyon niini didto sa Bali, Indonesia niaging semana. Gisaulog ni Pia iyang birthday pinaagi sa pagbakasyon.

Dating?

Gikagubtan karon sa mga pageant fans kining hulagway ni Miss Universe Catriona Gray ug La Salle Basketball player ug Director sa The Puso Foundation nga si Jordan Bartlett, nga mikatap karon sa internet. Suma pa sa mga chizmossa, daw naay something silang duha.