Wake me up when September ends

Suma pa sa kanta, “Wake me up when September ends.”  Pero ako my September  is really memorable. Kini gumikan kay natuman gyud akong kagustuhan nga mahinabi via my online show sa Banat News page ang mga banggiitan nga magsisibya sa Sugbo, pinasikad usab sa kasaulogan sa Cebu Broadcasters’ Month karong buwana. Pakpak!

Sanglit every Tuesday sa alas dos sa hapon raman akong online show, upat lang ang naa sa lineup. Nilang upat, usa ray nibalibad, pero nakasabot manko sa iyang rason so wala na lang ko namugos sab. So, unang nisalang niadtong September 3, si Sir Dante Luzon. Mura’g hasta man tingali mga millennial nakaila gyud niya sanglit ilang mga ginikanan fan ni Sir Dante niadtong anchor pa siya sa TV Patrol sa ABS-CBN sa hataas nga katuigan. So gibatbat niya sa show giunsa niya pagsugod sa media. Nindot iyang istorya sa kinabuhi nga sarang kakutloan og pagtulun-an sa mga kabatan-onan, ilabi na ang katong naghandum masulod sa media.

Sunod nga ni-guest si Atty. Divine Marcial Flores niadtong September 10. Wala man diay niya pangandoya ang tanan nga iyang nahuptan karon uy. Gidasig ra gyud siya nga mag-masscom kaniadto. Hangtud nga giganahan siya sa iyang kurso busa iyang gihuman. Hasta pud ang mamahimong abogada, naikag ra sab siya sa kaso nga iyang gi-cover kaniadto.

Unya, nisunod si Atty. Ruphil Bañoc niadtong September 17. Pobre sab siya og kagikan sama ni Atty. Divine. Sayo siya nga nagpas-an og responsibilidad sanglit nipanaw iyang inahan niadtong bata pa lang siya. Nitrabaho pa gyud siya og construction aron lang aduna siyay ikagasto sa college. Giasoy niya nga naningkamot gyud siya nga mamahimong abogado aron makadepensa siya sa iyang kaugalingon ug makamao gyud siya sa pasikot-sikot sa mga kaso.

Gitak-upan ni Kapamilyang Leo Lastimosa ang MARKado Broadcasters’ Month Special niadtong September 24. Mag-uuma iyang amahan ug public school teacher iyang inahan. Silang tanan managsuon puros mga scholar sa college kay mao gyuy ilang gipaningkamotan sanglit kuwang man ang pinansyal nga kapasidad sa pamilya. Bata pa lang, pangandoy na gyud niya nga madungog iyang tingog sa kahanginan ug mabasa iyang ngalan sa mantalaan.

 Nindot ang tanang interview. Naa gyud moy mapupo nga pagtulun-an. Makabaton sab mo og inspirasyon. I-like ang Banat News facebook page, unya adto mo sa video compilations aron makakita mo sa actual interview. Daghan kaayong salamat sa akong mga guests nga nisugot gyud dayon-walay daghan istorya. My September 2019 is for the books. Salamat sa Diyos! Pakpak!

Have a blessed Sunday, dear okRYANians!