Wala dawata?

CEBU, Philippines — Niulbo karon ang tsika nga matud pa wala dawata ni Maxine Medina ang pagpangayo og pasaylo ni Kylie Verzosa ngadto kaniya. Giingong dili  personal ang pagpangayo og pasaylo ni Kylie gumikan kay gipaagi lang kini og text message. Kahinumduman nga adunay init nga panagbangi ang duha   tungod kay giluwaan ni  Kylie si Maxine atol sa ilang taping sa ‘Los Bastardos’.

Nagsugod sa komedya

Gitug-an ni Kim Molina nga nagsugod sa komedya ang relasyon nila ni Jerald Napoles. Matud pa ni Kim nga gisakyan niya ang joke sa ilang mga kaubanan sa ‘Rak of Aegis’. Wala magdahum si Kim nga ang maong komedya ug tupo-tupo sa ilang mga kauban matinuod gyud .

Trailer sa IPWF

Gipagawas na  niadtong Lunes sa gabii ang trailer sa pelikula nila ni Carlo Aquino ug Maine Mendoza nga ‘Isa Pa With Feelings’. Gikatakda nga molugwa ang maong pelikula sa mga sinehan karong Oktubre 16, 2019.

Baby Vito

Malampuson nga gihimugso ni Saab Magalona ang ilang ikaduha nga anak ni Jim Bacarro nga si Vito Tomas. Sayo sa buntag kagahapon nanganak si Saab sa himsog nga batang lalaki. Ang gibug-aton ni Baby Vito miabot og  9.2 pounds.

Atimanon ang anak

Gitug-an ni Sitti Navarro nga dako ang kausaban karon sa iyang kinabuhi human  nakabaton na siya og anak ug tutok na siya sa iyang pamilya. Matud pa niya nga wala siya magmahay nga wala madayon ang iyang club tour tungod kay nasayran nga nagsabak na siya sa iyang unang anak. Karon, dili aktibo sa pagkanta si Sitti tungod kay mas kinahanglan niya atimanon ang iyang anak.

Nangandam na daan

Gipangandaman na nila ni Julie Anne San Jose ug Rayver Cruz nga aduna gyuy mokompara kanila ngadto sa pag-atake nila sa tagline sa ‘The Clash’ nga “Isa Laban Sa Lahat” nga una nga gibatbat ni Regine Velasquez kinsa nahimong labing una nga host sa maong show. Matud pa ni Julie Anne nga aduna sab silay lain na atake sa maong linya. Naghinaot si Julie Anne nga dawaton sab sila sa publiko karon nga sila na ang mahimong hosts sa maong reality singing search sa Kapuso network nga magsugod na karong Sabado.

Madungog sa Waze

Ang tingog ni Miss Universe 2018 Catriona Gray mao ang gigamit alang sa Navigation app nga Waze. Si Catriona ang labing una nga Filipino celebrity voice over sa maong application.

Unta dili maliwat

Gisaysay ni Solenn Heusaff nga adunay giingon ang iyang bana nga si Nico Bolzico nga unta dili lang maliwat sa iyang anak. Matud pa ni Solenn nga kiat gyud siya niadtong dalaga pa siya ug nanghinaot iyang bana nga dili kini maangkon ang maong batasan. “Sabi ni Nico, kapag babae ‘yung baby sana parang hindi katulad mo kasi I’m not very conservative let’s just say”, suma pa ni Solenn.

Dream Project

Giangkon sa real-life couple nga sila si Barbie Forteza ug Jak Roberto nga  dream project nila nga  makabuhat og usa ka romantic-comedy series. Matud pa ni Barbie nga mas dali alang kanila ang makabuhat sa maong proyekto gumikan kay natural lang sa ilang relasyon ang ilang pagkaromantiko ug pagbato og komedya sa usa’g usa.

Kulang sa tahi

Nitambong si Vivoree Esclito sa ABS-CBN Ball 2019 bisan wala mahuman og tahi ang  gisul-ob niya nga gown. Ang designer niini nga si Dominique Dy wala maka-deliver sa  katungdanan niini nga mabuhat sa gikatakda nga oras ang maong gown. Wala ra mohatag og komento si  Vivoree  kalabot niini.